منگلورو(فکروخبرنیوز) نیشنل ہائی وے 66 پر سورتکل جنکشن کے قریب ایک ٹرک سے جیلی پتھروں کے گرنے کے بعد سڑک پر پھیلی جیلی کو ہائی وے پٹرولنگ پولیس اور مقامی نوجوانوں نے فوری طور پر صاف کر کے ممکنہ بڑے حادثات کو ٹال دیا۔ اس بروقت کارروائی پر عوام نے ان کی بھرپور تعریف کی۔
اطلاعات کے مطابق ہائی وے پٹرولنگ ڈیوٹی پر موجود ہیڈ کانسٹیبل مہنتیش کلیاری (HC 421) اور ڈرائیور آنند میٹی (APC 2542) نے جب سڑک پرجیلی پھیلی دیکھی تو فوراً کارروائی کی۔ انہوں نے قریبی دکانوں میں موجود 5 سے 6 نوجوانوں کو صورتحال سے آگاہ کیا اور ان کی مدد سے تقریباً 100 میٹر تک پھیلی ہوئی جیلی کو اکٹھا کر لیا، جس کی مقدار لگ بھگ 10 ٹوکریاں تھی۔
بعد ازاں نیشنل ہائی ویز اتھارٹی کی ایک گاڑی کو طلب کیا گیا اور ملبے کو ہٹا کر سڑک کو دوبارہ محفوظ بنایا گیا۔
پولیس اور نوجوانوں کی اس فوری اور بروقت کارروائی کے نتیجے میں کئی ممکنہ جان لیوا حادثات سے بچاؤ ہوا۔ عوام نے پولیس اور نوجوانوں کی اس اجتماعی کوشش کو قابلِ ستائش قرار دیتے ہوئے ان کی چوکسی اور فرض شناسی کو سراہا۔
