کولکتہ، 21 جولائی — 32 سال قبل ووٹر شناختی کارڈ تحریک کے بعد، مغربی بنگال کی وزیر اعلیٰ ممتا بنرجی نے اعلان کیا ہے کہ وہ ایک نئی زبان تحریک شروع کر رہی ہیں تاکہ بنگلہ بولنے والے افراد کو "بنگلہ دیشی” کہہ کر نشانہ بنائے جانے کے خلاف آواز اٹھائی جا سکے۔
ممتا نے کولکتہ کے ایسپلانیڈ علاقے میں وکٹوریہ ہاؤس کے قریب منعقد سالانہ 21 جولائی ریلی سے تقریباً ایک گھنٹہ طویل خطاب میں کہا:
"اگر ضرورت پڑی تو ایک اور زبان کی تحریک ہوگی۔ یہ تحریک آج سے شروع ہو چکی ہے اور یہ 2026 کے اسمبلی انتخابات تک چلے گی۔”
ممتا بنرجی نے اعلان کیا کہ 2026 کے اسمبلی انتخابات میں ان کی پارٹی ترنمول کانگریس کا مرکزی انتخابی نعرہ "بنگلہ زبان کا وقار” ہوگا، اور یہ تحریک بی جے پی کی "بنگلہ مخالف پالیسیوں” کے خلاف ہوگی۔
اس موقع پر اسٹیج پر کوچ بہار کے رہائشی اُتم کمار بھی موجود تھے، جنہیں آسام کے فارنرز ٹریبونل نے نوٹس جاری کیا تھا کہ وہ اپنی ہندوستانی شہریت ثابت کریں۔
"ہم ہر بنگلہ بولنے والے کی گرفتاری پر احتجاج کریں گے”ممتا نے کہا:
"جہاں بھی بنگلہ بولنے والے لوگوں کو حراست میں لیا جائے گا، ہم احتجاج کریں گے۔ اگر ایک بھی شخص کو گرفتار کیا گیا تو ہم خاموش نہیں بیٹھیں گے۔ میں چیلنج دیتی ہوں، وہ کتنے جیل اور ڈیٹنشن سینٹر بنا سکتے ہیں؟”
ریلی میں ممتا نے اس مسئلے کو سیاسی رنگ دیتے ہوئے کہا کہ بی جے پی حکومت دانستہ طور پر بنگلہ بولنے والوں کو "بنگلہ دیشی” قرار دے کر حراست میں لے رہی ہے۔ حالیہ ہفتوں میں ترنمول نے یہ معاملہ کئی بار اٹھایا کہ کئی بنگلہ بولنے والے شہریوں کو بغیر کسی ثبوت کے بنگلہ دیشی قرار دے کر بین الاقوامی سرحد کے اُس پار دھکیل دیا گیا۔ بعد میں وہ لوگ بنگال میں اپنے گھروں کو واپس آ گئے۔
اس کے برعکس، بی جے پی کے رہنما اور اپوزیشن لیڈر شوبھندو ادھیکاری نے الزام لگایا کہ ممتا حکومت نے انتخابی فائدے کے لیے 17 لاکھ روہنگیاؤں کو ووٹر لسٹ میں شامل کیا ہے۔
"اقوام متحدہ نے تو کہا ہے کہ روہنگیاؤں کی کل تعداد 10 لاکھ ہے، پھر یہ 17 لاکھ کا عدد کہاں سے آیا؟”
ترنمول کے جنرل سیکریٹری اور رکن پارلیمان ابھشیک بنرجی نے اعلان کیا کہ پارٹی کے تمام ایم پیز پارلیمنٹ کے مانسون اجلاس میں بنگلہ زبان میں تقریر کریں گے۔ انہوں نے کہا:”بی جے پی بنگالیوں کو ڈیٹنشن کیمپ بھیجنا چاہتی ہے۔ لیکن 2026 کے بعد عوام بی جے پی کو سیاسی ڈیٹنشن میں ڈالیں گے۔ ہمیں صرف اس لیے نشانہ بنایا جا رہا ہے کہ ہم بنگلہ بولتے ہیں۔ ہمنتا بسوا سرما کے خلاف بی جے پی نے اب تک کوئی کارروائی کیوں نہیں کی؟”
2026 ممتا بنرجی نے انتخابات کا بجادیا بگل ، بی جے پی کے خلاف نئی تحریک کا اعلان
