منگلور : ساحلی کرناٹک میں مسلسل موسلادھار بارش کے باعث کئی سنگین واقعات رونما ہوئے، جن سے عوامی زندگی بری طرح متاثر ہے۔
منگلورو کے میری ہِل علاقے میں 16 جولائی کی رات شدید بارش کے دوران ایک پرانی کمپاؤنڈ کی دیوار گر گئی۔ اس سے وہاں کھڑی تقریباً 8 سے 10 دو پہیہ گاڑیاں اور ایک کار شدید متاثر ہوئی، مگر خوش قسمتی سے کوئی جانی نقصان نہیں ہوا۔ مقامی افراد نے تیز آواز سن کر واقعہ فوراً رپورٹ کیا، جس پر ایمرجنسی ٹیمیں فوری ملبہ ہٹانے کے لیے پہنچ گئیں ۔
اسی دوران اڈپی ضلع کے کاؤپ تعلقہ میں چند گھروں میں پانی داخل ہو گیا، خاص طور پر پیڈبیدری کے پیڈے بیٹو علاقے میں کم از کم پانچ کنبوں کو محفوظ مقام پر منتقل کیا گیا۔ 24 افراد کو ریاستی ڈیزاسٹر رسپانس فورس (SDRF) نے نکالا ۔ پانی کے بڑھنے سے دریا کے کنارے بسنے والے شہریوں کی زندگی و سفر متاثر ہوا، اور انتظامیہ نے مچھلی پکڑنے والے ملاحوں کو سمندر میں جانے سے روک دیا۔
بارش کے ساتھ ساتھ مٹی کے تودے گرنے (لینڈ سلائیڈنگ) کے واقعات بھی سامنے آئے، جس سے چند اہم شاہراہوں پر آمدورفت متاثر ہوئی۔ اگرچہ حکام کی جانب سے فوری کلیئرنگ کا عمل شروع کر دیا گیا ہے، تاہم ٹریفک بحالی میں وقت لگ رہا ہے۔
