ترکی کی وزارتِ دفاع کے مطابق نیٹو کے فضائی دفاعی نظام نے ایران سے داغا گیا ایک بیلسٹک میزائل تباہ کر دیا جو ترکی کی جانب بڑھ رہا تھا۔ حکام نے بدھ کے روز بتایا کہ میزائل کو اس وقت نشانہ بنایا گیا جب وہ عراقی اور شامی فضائی حدود عبور کرنے کے بعد ترکی کی سمت بڑھ رہا تھا، تاہم اسے ترک فضائی حدود میں داخل ہونے سے پہلے ہی مار گرایا گیا۔
ترک وزارتِ دفاع کا کہنا ہے کہ میزائل کو تباہ کرنے کے لیے استعمال ہونے والے انٹرسیپٹر میزائل کا ایک ٹکڑا صوبہ حطائے کے ضلع دورتیول میں گر گیا، تاہم اس واقعے میں کسی جانی یا مالی نقصان کی اطلاع نہیں ملی۔
انقرہ نے واضح کیا کہ ترکی اپنی قومی سلامتی کے تحفظ کے لیے مکمل عزم اور صلاحیت رکھتا ہے۔ بیان میں کہا گیا کہ ترکی خطے میں امن اور استحکام کا حامی ہے، لیکن کسی بھی خطرے کے خلاف اپنے شہریوں اور سرزمین کا دفاع کرنے کی پوری اہلیت رکھتا ہے۔
ترک حکام نے خبردار کیا کہ کسی بھی جارحانہ اقدام کا بھرپور جواب دیا جائے گا اور تمام فریقین سے اپیل کی کہ وہ ایسے اقدامات سے گریز کریں جو خطے میں کشیدگی کو مزید بڑھا سکتے ہیں۔
ترکی نے یہ بھی کہا کہ وہ اس معاملے پر نیٹو اور اپنے اتحادی شراکت داروں کے ساتھ مشاورت جاری رکھے گا۔
ترکی کے سربراہِ شعبۂ مواصلات برہان الدین دوران نے بیان میں کہا کہ تمام فریقوں کو خبردار کیا جاتا ہے کہ ایسے اقدامات سے باز رہیں جو خطے میں کشیدگی بڑھا کر تنازع کو وسیع تر جنگ میں تبدیل کر سکتے ہیں۔ انہوں نے سوشل میڈیا صارفین سے بھی اپیل کی کہ غیر مصدقہ معلومات پھیلانے سے گریز کریں۔