سماجوادی پارٹی کے معروف لیڈر اور مہاراشٹر کی سیاست کا ایک بڑا نام ابو عاصم اعظمی نے جب سے مغل بادشاہ اورنگ زیب کی تعریف میں بیان دیا ہے، ریاست کا سیاسی پارہ بڑھا ہوا ہے۔ لگاتار ابو عاصم اعظمی کی تنقید ہو رہی ہے اور ساتھ ہی اورنگ زیب کی قبر کو منہدم کرنے کا مطالبہ بھی زور پکڑتا جا رہا ہے۔ اس معاملے میں مہاراشٹر کے وزیر اعلیٰ دیویندر فڑنویس نے ایک بیان میں وضاحت پیش کی ہے کہ آخر اورنگ زیب کی قبر کو منہدم کرنا کیوں مشکل ہے۔
وزیر اعلیٰ نے ایک تقریب کے بعد نامہ نگاروں سے بات چیت کرتے ہوئے کہا کہ ’’ہم سبھی لوگوں کو لگتا ہے چھترپتی سنبھا جی نگر (پرانا نام اورنگ آباد) سے مغل بادشاہ اورنگ زیب کی قبر کو منہدم کر دیا جائے۔ حالانکہ ایسا کرنا صرف قانون کے دائرے میں رہتے ہوئے ہی ممکن ہو سکتا ہے۔‘‘ دیویندر فڑنویس کا کہنا ہے کہ اورنگ زیب کی قبر اے ایس آئی (آرکیالوجیکل سروے آف انڈیا) کے تحت ایک محفوظ اسمارک (یادگار) ہے۔ کانگریس کی مدت کار میں اس قبر کو اے ایس آئی کا تحفظ فراہم کیا گیا تھا۔ اس لیے قبر کو منہدم کرنا آسان نہیں ہے، اس کے لیے قانونی راستہ ہموار کرنا ہوگا۔
قابل ذکر ہے کہ چھترپتی سنبھاجی نگر ضلع میں واقع اورنگ زیب کی قبر کو منہدم کرنے کا مطالبہ بی جے پی کے ستارا سے رکن پارلیمنٹ ادین راجے بھوسلے نے کی تھی۔ اسی کے جواب میں وزیر اعلیٰ فڑنویس نے وضاحت کی اور اورنگ زیب مخالفین کو حقائق سے آشنا کرایا۔ انھوں نے واضح لفظوں میں کہا کہ ’’ہم سبھی ایک ہی بات مانتے ہیں، لیکن کچھ بھی قانون کے تحت ہی کیا جانا چاہیے۔‘‘
