نئی دہلی: ہندوستان میں مقدس ترین مہینے رمضان کا آغاز اتوار کو ہوا اور آج ملک بھر کے مسلمانوں کا پہلا روزہ ہے۔ ہفتے کی شام رمضان المبارک کا چاند نظر آنے کے بعد لوگوں نے ایک دوسرے کو مبارکباد دی۔ اس موقعے پر وزیر اعظم نریندر مودی نے ملک کے تمام شہریوں کے لیے نیک خواہشات کا اظہار کیا۔
انسٹاگرام پر ایک پوسٹ میں پی ایم مودی نے لکھا کہ "رمضان کا مقدس مہینہ شروع ہو رہا ہے۔ یہ ہمارے معاشرے میں امن اور ہم آہنگی لائے۔ یہ مقدس مہینہ غور و فکر، شکر گزاری اور عقیدت کی علامت ہے اور ہمیں ہمدردی، مہربانی اور خدمت کی اقدار کی یاد دلاتا ہے۔ رمضان مبارک!
پی ایم مودی نے جمعہ کو جہان خسرو کے 25ویں ایڈیشن میں شرکت کی اور رمضان کی پیشگی مبارکباد دی۔ انہوں نے جامعیت اور ہم آہنگی کے پیغام کے لیے ہندوستان کی صوفیانہ روایت کی بھی تعریف کی۔
اتر پردیش کے وزیر اعلی یوگی آدتیہ ناتھ نے بھی لوگوں کو رمضان کی مبارکباد دی۔ انہوں نے ایک سرکاری بیان میں کہا کہ "ان مقدس دنوں کے دوران، روزہ، ضبط نفس، صبر اور عبادت جیسے اچھے اعمال رواداری، سادگی اور باہمی بھائی چارے کی اقدار کو فروغ دیتے ہیں۔”
