نئی دہلی: ہندوستانی ریلوے نے اب اسٹیشنوں، ٹرینوں اور اس کی جائیدادوں پر ویڈیو گرافی اور فوٹو گرافی کے حوالے سے نئے احکامات جاری کیے ہیں۔ معلومات کے مطابق ریلوے اب ایسے لوگوں کے خلاف سخت کارروائی کرنے جا رہا ہے۔ اس سلسلے میں شمال مشرقی ریلوے نے بلاگرز اور یوٹیوبرز سے درخواست کی ہے۔
ریلوے نے کہا کہ قومی سلامتی کے پیش نظر سٹیشنوں کی تصاویر یا ویڈیو نہ بنائیں۔ آپ کو بتاتے چلیں کہ ریلوے نے یہ فیصلہ جیوتی ملہوترا کیس کے پیش نظر کیا ہے، جسے پاکستان کے لیے جاسوسی کے الزام میں گرفتار کیا گیا تھا۔
ای ٹی وی بھارت سے بات کرتے ہوئے ریلوے بورڈ کے ایگزیکٹو ڈائریکٹر (آئی اینڈ پی) دلیپ کمار نے کہا کہ ریلوے اسٹیشنوں پر کمرشل ویڈیو گرافی پر پابندی ہے، اگر کوئی ایسا کرنا چاہتا ہے تو اسے پہلے اتھارٹی سے اجازت لینا ہوگا۔ اسی فیصلے پر ایسٹرن ریلوے کے چیف پبلک ریلیشن آفیسر دپٹمے دتہ نے کہا کہ حفاظتی اقدامات پہلے سے ہی موجود ہیں، جس کے تحت متعلقہ اتھارٹی کی پیشگی اجازت کے بغیر اسٹیشنوں یا کسی بھی ریلوے پراپرٹی پر فوٹو گرافی یا ویڈیو گرافی کی اجازت نہیں ہے۔
دتہ نے مزید کہا کہ ایسے میں ریلوے کے پاس پہلے سے ایک اصول ہے، جس کے تحت مشرقی ریلوے سے متعلق کسی بھی جگہ پر فوٹو گرافی یا ویڈیو گرافی کرنے سے پہلے طے شدہ اصولوں پر عمل کرنے کی ہدایت کر رہا ہے۔ اب ہم ایسے قوانین پر سختی سے عمل کر رہے ہیں اور اس بات کو یقینی بنا رہے ہیں کہ کوئی اس کی خلاف ورزی نہ کرے۔ ریلوے حکام نے کہا کہ ویڈیو گرافی اور فوٹو گرافی کے لیے مقررہ اصول اور ریل مینوئل ہیں جن پر عمل کرنا ضروری ہے۔ ریلوے حکام نے کہا کہ اب وہ تمام اسٹیشنوں پر نگرانی بڑھائیں گے اور اس بات کو یقینی بنائیں گے کہ کوئی بھی اہم اسٹیشنوں کی تفصیلی تصاویر نہ لے سکے۔
ریلوے مینوئل کے مطابق ہندوستانی شہریوں کو تصویر یا ویڈیو فوٹوگرافی کی اجازت متعلقہ ریلوے/یونٹ کے چیف پبلک ریلیشن آفیسرز دیں گے۔ دوسری جانب غیر ملکی شہریوں کو اس کی اجازت ریلوے بورڈ کے ڈائریکٹوریٹ آف پبلک ریلیشنز سے دی جائے گی۔ تاہم اگر ان تصاویر اور ویڈیوز کو تجارتی یا کاروباری مقاصد کے لیے استعمال کیا جانا ہے، تو متعلقہ ریلوے/یونٹ کی طرف سے ضروری رسمی کارروائیاں مکمل کرنے اور لائسنس کی مقررہ فیس لینے کے بعد اجازت دی جائے گی۔
سیکورٹی پر کوئی سمجھوتہ نہیں کیا جائے گا۔
ای ٹی وی بھارت سے بات کرتے ہوئے ریلوے کے ترجمان نے کہا کہ کچھ بلاگرز اور یوٹیوبرز ریلوے اسٹیشنوں کی ویڈیوز بنانا شروع کر دیتے ہیں جو کہ تشویشناک ہے۔ انہوں نے کہا کہ ہم ملکی سلامتی پر ہر گز سمجھوتہ نہیں کر سکتے۔ یہ فیصلہ سیکورٹی کو مدنظر رکھتے ہوئے کیا گیا ہے۔ تاہم ترجمان کا مزید کہنا تھا کہ اگر میڈیا یا نیوز چینلز کو کسی پروگرام کی کوریج کرنی ہے تو وہ اس کے لیے خصوصی اجازت لے سکتے ہیں۔ یہ اصول صرف عام لوگوں کے لیے لاگو کیا گیا ہے۔
