اڈپی(فکروخبرنیوز) شہر کے مصروف ترین علاقے سٹی بس اسٹینڈ کے بالکل سامنے واقع ایک قدیم عمارت میں اتوار، 26 اپریل کی شام اچانک آگ بھڑک اٹھی۔ یہ عمارت شہر کے قلب میں ایک اہم مقام پر واقع ہے، جہاں واقع چند دکانیں آگ لگنے کے وقت کھلی ہوئی تھیں۔ اگرچہ اس واقعے میں کسی جانی نقصان کی اطلاع نہیں ملی ہے لیکن بعض دکانیں پوری طرح جل کر خاکستر ہوگئی۔ آگ لگنے کی وجوہات اب تک معلوم نہیں ہو سکی ہیں۔واقعے کے وقت جائے وقوعہ پر موجود عینی شاہدین نے فائر بریگیڈ کے تاخیر سے پہنچنے پر سخت ناراضگی کا اظہار کیا۔ لوگوں کا کہنا تھا کہ شہر کے مرکز میں واقعہ ہونے کے باوجود ہنگامی خدمات کو پہنچنے میں وقت لگا، جس سے خطرہ مزید بڑھ سکتا تھا۔اس کے بعد اڈپی، ملپے، پڈوبدری اور کنداپور سے فائر اینڈ ایمرجنسی سروسز کی چار گاڑیوں نے موقع پر پہنچ کر آگ بجھانے کی کارروائی میں حصہ لیا۔ فائر فائٹرز کی انتھک محنت کے بعد آگ پر مکمل طور پر قابو پا لیا گیا، جس سے اطراف کی دیگر عمارتوں کو نقصان پہنچنے سے بچا لیا گیا۔ مقامی پولیس معاملے کی تفتیش کر رہی ہے تاکہ آگ لگنے کی اصل وجہ کا تعین کیا جا سکے۔
