بنگلورو/کوئمبتور (فکروخبرنیوز) تمل ناڈو پولیس کے ایک جاں باز ہیڈ کانسٹیبل نے ممنوعہ گٹکا اسمگلروں کو فرار ہونے سے روکنے کے لیے اپنی جان جوکھم میں ڈال کر ایک انتہائی سنسنی خیز اور بہادرانہ کارروائی انجام دی ہے۔ کوئل پالائم پولیس اسٹیشن سے وابستہ ہیڈ کانسٹیبل ویلموروگن نے اسمگلروں کو پکڑنے کے لیے تیز رفتار کار کی چھت پر تقریباً 40 کلومیٹر تک لٹک کر سفر کیا، جس کی ویڈیو سوشل میڈیا پر وائرل ہونے کے بعد ان کی شجاعت کو زبردست خراجِ تحسین پیش کیا جا رہا ہے۔
اطلاعات کے مطابق یہ واقعہ اس وقت پیش آیا جب کوئمبتور کے قریب ہیڈ کانسٹیبل ویلموروگن اور سب انسپکٹر وگنیش گاڑیاں چیک کر رہے تھے۔ اس دوران انہوں نے بنگلورو سے آنے والی ایک مشکوک کار کو روکا جس میں تقریباً 300 کلوگرام ممنوعہ گٹکا اور تمباکو مصنوعات موجود تھیں۔ جب سب انسپکٹر وگنیش گاڑی کے پچھلے حصے میں سامان کی تلاشی لے رہے تھے، تو کار میں سوار افراد نے انہیں دھکا دیا، تمام دروازے اندر سے لاک کیے اور اچانک گاڑی تیزی سے بھگا دی۔
اس اہم پیش رفت پر ہیڈ کانسٹیبل ویلموروگن نے فوری حاضر دماغی کا مظاہرہ کیا اور اسمگلروں کو بھاگنے کا موقع دیے بغیر چھلانگ لگا کر کار کی چھت پر چڑھ گئے اور دونوں ہاتھوں سے اسے مضبوطی سے پکڑ لیا۔ کار سوار انتہائی تیز رفتاری سے گاڑی چلاتے رہے، لیکن کانسٹیبل نے ہمت نہ ہاری اور کارکو تھامے رکھا۔
واقعے کی اطلاع ملتے ہی کارومتھم پٹی اور اویناشی پولیس اسٹیشن کی ٹیموں نے ایمبولینس کے ساتھ اس گاڑی کا تعاقب شروع کیا۔ تقریباً 40 کلومیٹر کے خطرناک تعاقب کے بعد اویناشی میں اناپورنا ہوٹل کے قریب پولیس کی گاڑیوں اور ایمبولینس نے اسمگلروں کی کار کو چاروں طرف سے گھیر کر روک لیا۔
پولیس نے کارروائی کرتے ہوئے راجستھان سے تعلق رکھنے والے تینوں ملزمین کو گرفتار کر لیا اور ان کے قبضہ سے 300 کلو گرام ممنوعہ گٹکا اور کارکو تحویل میں لے لیا۔ یہ گینگ بنگلورو سے کوئمبتور غیر قانونی طور پر تمباکو مصنوعات منتقل کررہی تھی۔ سوشل میڈیا پر وائرل ویڈیو کے بعد عوام تمل ناڈو پولیس محکمہ سے مطالبہ کر رہے ہیں کہ ہیڈ کانسٹیبل ویلموروگن کو ان کی اس جرات مندانہ کارروائی کے بدلے فوری طور پر عہدے میں ترقی (پروموشن) دی جائے۔
