بھٹکل (فکروخبر نیوز) رابطہ سوسائٹی بھٹکل کے زیرِ اہتمام منعقد ہونے والے طلبہ کے مقبول اور باوقار "رابطہ تعلیمی ایوارڈ 2026” کے انعقاد کی تاریخ، پروگرام کی تفصیلات اوراہلیت کے نئے ضوابط کا باضابطہ اعلان کر دیا گیا ہے۔ تعلیمی حلقوں میں ہر سال بے چینی سے منتظر رہنے والی یہ تقریب امسال 25 صفر المظفر 1448ھ مطابق 9 اگست 2026 بروز اتوار کو انجمن گراؤنڈ بھٹکل میں منعقد ہوگی۔
رابطہ سوسائٹی کے سکریٹری جنرل جناب عتیق الرحمن منیری نے میڈیا کو تفصیلات فراہم کرتے ہوئے بتایا کہ امسال کی تقریب کو خصوصی اہمیت حاصل ہوگی، کیونکہ ملک کی ممتاز تعلیمی شخصیت اور سول سروسز کے معروف ماہر جناب سمیر احمد صدیقی بطور مہمانِ خصوصی شرکت کریں گے۔ موصوف نئی دہلی کے معروف سول سروسز تربیتی اداروں سے وابستہ ہیں اور بین الاقوامی تعلقات، جنرل اسٹڈیز اور مسابقتی امتحانات کی تیاری کے میدان میں وسیع تجربہ رکھتے ہیں۔ انہوں نے ملک بھر کے متعدد مسلم نوجوانوں کو آئی اے ایس، آئی پی ایس اور دیگر اعلیٰ سرکاری خدمات کے امتحانات میں کامیابی کے لیے رہنمائی فراہم کی ہے۔
انہوں نے بتایا کہ پروگرام دو نشستوں پر مشتمل ہوگا۔ پہلا سیشن صبح 10 بجے سے 12:45 بجے تک جبکہ دوسرا سیشن نمازِ عصر کے بعد سے مغرب تک جاری رہے گا، جس میں طلبہ، اساتذہ، سرپرستوں اور مختلف تعلیمی اداروں کے ذمہ داران کی بڑی تعداد شریک ہوگی۔
ایوارڈز کے معیار اور اہلیت کے بارے میں گفتگو کرتے ہوئے رابطہ سوسائٹی کے خازن مولانا صابر علی اکبرا ندوی نے بتایا کہ اس سال بھی ایوارڈز کو چار زونز؛ بھٹکل، گلف، اندرونِ ہند اور کنیرا مسلم خلیج کونسل کے تحت تقسیم کیا گیا ہے۔ انہوں نے کہا کہ پی یو سی دوم (PUC II) کے طلبہ کے لیے امسال اہلیت کا معیار 90 فیصد سے بڑھا کر 95 فیصد مقرر کیا گیا ہے، جبکہ ایس ایس ایل سی (SSLC) کے لیے گزشتہ سال کی طرح 95 فیصد نمبرات لازمی ہوں گے۔
اسی طرح انجمن کے مختلف کالجوں اور شعبہ جات جیسے BA، BSc، BCom، BBA، BBM، B.Ed.، BE اور پی جی کورسز MBA، MCA اور MCom کے ٹاپرز کے لیے کم از کم 85 فیصد نمبرات ضروری قرار دیے گئے ہیں۔ اس کے علاوہ جامعہ اسلامیہ بھٹکل کے دو نمایاں طلبہ اور جامعۃ الصالحات کی دو نمایاں طالبات کو بھی خصوصی طور پر اس اعزاز سے نوازا جائے گا۔
گلف ممالک میں زیرِ تعلیم طلبہ کے لیے گریڈنگ سسٹم کو مدنظر رکھتے ہوئے A+ گریڈ کو لازمی قرار دیا گیا ہے۔ گلف زون میں دسویں جماعت کے تین نمایاں طلبہ، بارہویں جماعت کے ہر شعبے کے ایک ٹاپر اور ایک ڈگری ٹاپر (85 فیصد) کو ایوارڈ دیا جائے گا۔
رابطہ سوسائٹی نے ضلع ٹاپرز کے لیے خصوصی اعزازات کا بھی اعلان کیا ہے۔ اس کے علاوہ مقامی تعلیمی اداروں اور اساتذہ کی حوصلہ افزائی کے مقصد سے "بیسٹ اسکول ایوارڈ” اور "بیسٹ ٹیچر ایوارڈ” کو بھی پروگرام کا حصہ بنایا گیا ہے۔
رابطہ تعلیمی ایوارڈ 2026 کے کنوینر جناب عبدالسلام دامدا ابو (سابق صدر جدہ جماعت) مقرر کیے گئے ہیں، جو ایوارڈ کمیٹی کے دیگر اراکین کے ساتھ مل کر تقریب کی تیاریوں کو حتمی شکل دینے میں مصروف ہیں۔
