دبئی (فکروخبرنیوز) دبئی کی معروف تجارتی کمپنی نھیٰ جنرل ٹریڈنگ نے اپنے کامیاب تجارتی سفر کے 25 سال مکمل ہونے پر سلور جوبلی کی ایک پُروقار اور یادگار تقریب کا اہتمام بروز اتوار کو کیا۔ دبئی میں ایک کروز پر منعقدہ اس تقریب میں بھٹکل و اطراف کی متعدد سرکردہ شخصیات، دوست احباب اور معزز مہمانوں نے شرکت کی۔
اس موقع پر کمپنی کے مالک جناب عتیق الرحمن منیری نے اپنی زندگی کے نشیب و فراز اور تجارتی کامیابیوں کی داستان حاضرین کے سامنے پیش کی۔ انہوں نے بتایا کہ تقریباً 40 سال قبل سعودی عرب کے شہر دمام میں محض 800 ریال ماہانہ تنخواہ پر ملازمت سے اپنی عملی زندگی کا آغاز کیا تھا۔ محدود آمدنی، سخت محنت اور کفایت شعاری کے ساتھ شروع ہونے والا یہ سفر وقت کے ساتھ ایک کامیاب تجارتی ادارے کی شکل اختیار کرگیا۔
انہوں نے اپنے والدِ محترم الحاج محی الدین منیری کو خصوصی طور پر یاد کرتے ہوئے بتایا کہ سعودی عرب جانے کے لیے انہوں نے اپنے والد سے ساڑھے بارہ ہزار روپے قرض لیے تھے۔ والد نے یہ رقم اس تاکید کے ساتھ دی تھی کہ اسے واپس کرنا ہوگا اور ہر ماہ پانچ سو روپے ادا کرنے ہوں گے۔
عتیق الرحمن منیری نے بتایا کہ ابتدائی دنوں میں محدود تنخواہ کے باعث بچت کرنا مشکل تھا، چنانچہ انہوں نے فارغ اوقات میں دوسری ملازمت بھی شروع کردی۔ اخراجات کم کرنے کے لیے وہ کئی میل پیدل سفر کیا کرتے تھے تاکہ آمدورفت کے اخراجات بچاسکیں۔
اپنی کامیابی کا ذکر کرتے ہوئے انہوں نے والد کی رہنمائی اور اپنی شریکِ حیات کے تعاون و حوصلہ افزائی کو خصوصی اہمیت دی۔ انہوں نے نوجوانوں کو پیغام دیا کہ محنت، مستقل مزاجی، دیانت داری اور امانت داری کو اپنا شعار بنائیں، کیونکہ یہی اوصاف تجارت میں کامیابی کی مضبوط بنیاد ہیں۔
تقریب میں بھٹکل واطراف کی شریک معزز شخصیات نے بھی اپنے تاثرات پیش کیے اور موصوف کی تجارتی کامیابیوں کے ساتھ ان کی قومی، ملی اور فلاحی خدمات کو سراہا۔ مقررین نے مختلف اداروں کے ساتھ ان کے تعاون اور خدمتِ خلق کے جذبے کو قابلِ تحسین قرار دیا۔
اس موقع پر ادارہ فکروخبر بھٹکل جناب عتیق الرحمن منیری اور ان کے اہلِ خانہ کو دلی مبارکباد پیش کرتے ہوئے ان کی تجارت میں مزید ترقی، کامیابی اور قومی و ملی خدمات میں وسعت کے لیے نیک تمناؤں کا اظہار کرتا ہے۔




