بنگلورو (فکروخبر نیوز) کرناٹک راجیہ مسلم اوکوٹا (KRMO) نے ریاستی حکومت کی جانب سے مسلمانوں سے کیے گئے انتخابی وعدوں کی تکمیل کے مطالبے کو لے کر ریاست گیر بیداری مہم شروع کرنے کا اعلان کیا ہے۔ پیر کے روز بنگلورو پریس کلب میں منعقدہ پریس کانفرنس سے خطاب کرتے ہوئے اوکوٹا کے کوآرڈینیٹر سہیل احمد مرور نے کہا کہ کانگریس حکومت کو اقتدار سنبھالے تین سال سے زائد کا عرصہ گزر چکا ہے، لیکن مسلم برادری سے کیے گئے کئی اہم وعدے اب تک پورے نہیں کیے گئے۔ انہوں نے زور دے کر کہا کہ مسلمانوں کے لیے 2B ریزرویشن کی بحالی تنظیم کا سب سے اہم مطالبہ ہے اور اس معاملے میں مزید تاخیر ناقابلِ قبول ہے۔
پریس کانفرنس میں اوکوٹا کے کنوینر یحییٰ دامودی نے بیداری مہم کی تفصیلات پیش کرتے ہوئے بتایا کہ یہ مہم 5 اگست تک جاری رہے گی، جس میں ریاست بھر کی مسجد کمیٹیوں، علمائے کرام، ملی تنظیموں اور سماجی کارکنان کو شامل کیا جائے گا۔ مہم کے دوران مختلف مقامات پر بیداری اجتماعات منعقد کیے جائیں گے، جمعہ کی نماز کے بعد دستخطی مہم چلائی جائے گی اور عوامی نمائندوں سے ملاقاتوں کے ذریعے مطالبات حکومت تک پہنچائے جائیں گے۔
سہیل احمد مرور نے کہا کہ مسلم برادری کو درپیش دیگر اہم مسائل بھی تنظیم کی ترجیحات میں شامل ہیں، جن میں نفرت انگیز تقاریر کے خلاف مؤثر کارروائی، انسدادِ گئو کشی قانون میں ترمیم، تبدیلیِ مذہب مخالف قانون کی منسوخی، ذات پات پر مبنی سروے رپورٹ کا نفاذ، اقلیتی فلاح و بہبود کے لیے دس ہزار کروڑ روپے کے فنڈ کا اجراء اور وقف املاک کا تحفظ شامل ہیں۔ انہوں نے دعویٰ کیا کہ حجاب سے متعلق حکومتی فیصلے میں بھی تنظیم کی مسلسل جدوجہد کا اہم کردار رہا ہے۔
انہوں نے بتایا کہ یہ مہم داونگیرے میں منعقد ہونے والے ایک بڑے ریاستی کنونشن پر اختتام پذیر ہوگی، جہاں حکومت کی کارکردگی کا جائزہ پیش کرتے ہوئے ایک تفصیلی ’’رپورٹ کارڈ‘‘ جاری کیا جائے گا۔ اس موقع پر حارث صدیقی اور تنویر احمد بھی موجود تھے۔
