بنگلورو (فکروخبر نیوز) کرناٹک حکومت نے سڑک حادثات پر قابو پانے، پیدل چلنے والوں کے تحفظ اور ٹریفک قوانین کی پاسداری کو یقینی بنانے کے لیے چند انتہائی سخت اور اہم فیصلے کرنے کا اشارہ دیا ہے۔ حکومت نے غیر معیاری ‘ہاف ہیلمٹ’ (Half Helmets) کی فروخت و استعمال پر مکمل پابندی عائد کرنے سمیت فٹ پاتھ پر دو پہیہ گاڑیاں چلانے والوں پر جرمانے کی رقم میں 10 گنا تک اضافہ کرنے کا فیصلہ کیا ہے۔
بنگلورو میں میڈیا نمائندوں سے بات کرتے ہوئے ریاست کے وزیر برائے ٹرانسپورٹ بائراتی سریش نے بتایا کہ ہاف ہیلمٹ کے بڑھتے ہوئے استعمال کو روکنے کے لیے حکومت مینوفیکچررز اور تاجروں کے خلاف قانونی کارروائی کی تیاری کر رہی ہے۔ انہوں نے کہا کہ قانون میں ہاف ہیلمٹ کی کوئی گنجائش نہیں ہے، کیونکہ یہ حادثے کے وقت سر اور چہرے کو تحفظ فراہم نہیں کرتے۔ اس لیے دکانوں اور گوداموں میں ایسے ہیلمٹ کا اسٹاک رکھنے والوں کے خلاف قانونی شقوں کا جائزہ لیا جا رہا ہے۔
علاوہ ازیں وزیر موصوف نے بتایا کہ فٹ پاتھوں پر گاڑیاں چلا کر شہریوں کی زندگیوں کو خطرے میں ڈالنے والوں کے خلاف بھاری جرمانہ عائد کیا جائے گا۔ پہلے سے عائد 500 روپے کے جرمانے کو بڑھا کر پہلی خلاف ورزی پر 5,000 روپے اور دوسری خلاف ورزی پر 10,000 روپے کرنے کی تجویز لاء ڈیپارٹمنٹ کو بھیجی گئی ہے۔ اسی طرح ‘ون وے’ (یک طرفہ راستے) کی خلاف ورزی پر بھی موجودہ 1,000 روپے کے جرمانے کو 10 گنا تک بڑھانے پر غور کیا جا رہا ہے۔
اس سے قبل محکمہ داخلہ اور ٹرانسپورٹ کا ایک اعلیٰ سطحی اجلاس منعقد ہوا جس میں ریاست میں ‘پوائنٹس بیسڈ ڈرائیونگ لائسنس سسٹم’ متعارف کرانے پر بات چیت کی گئی۔ اس نئے نظام کے تحت ٹریفک قوانین کی بار بار خلاف ورزی کرنے والے ڈرائیوروں کے پوائنٹس کاٹے جائیں گے اور ایک خاص حد پار کرنے پر ان کا ڈرائیونگ لائسنس معطل کر دیا جائے گا۔ اس کے لیے سارتھی (Sarathi) پورٹل کو ای چالان سسٹمز سے جوڑنے کی منصوبہ بندی کی جا رہی ہے۔
