بھٹکل (فکروخبر/پریس ریلیز) ادارہ ادب اطفال بھٹکل کی سہ سالہ میعاد کے انتخابات کل مؤرخہ 12 محرم الحرام 1448 ھ مطابق 28 جون 2026 اتوار کی شب ادارے کے دفتر ہی میں منعقد ہوئے۔جس میں باہمی مشورے سے ادارہ ادب اطفال بھٹکل کی مختلف ذمہ داریاں تقسیم کی گئیں۔
اس مرتبہ میراں معظم شاہ بندری ناظم انتخابات بنائے گئے تھے،انھوں نے بڑی خوبی کے ساتھ انتخابات کے تمام مرحلوں کو مکمل کیا۔
ادارہ ادب اطفال بھٹکل کے ابتدائی سالوں میں شوری اور مجلس عاملہ کا نظام نہ تھا لیکن پھر کام کے پھیلاؤ اور افراد کی کثرت کو مدنظر رکھ کر اس کی ترتیب بنائی گئی اور الحمدللہ اب اس کی دوسری میعاد ختم ہوکر ادارہ ادب اطفال اپنی تیسری میعاد کی طرف ایک نئے عزم، جوش و خروش اور تجدید نیت کے ساتھ آگے بڑھ رہا ہے۔
اس بار ادارے کے عہدوں اور مختلف شعبوں میں بڑی تبدیلیاں بھی کی گئیں، خوشی کی بات یہ ہے کہ مسلسل تیسری دفعہ ڈاکٹر عبدالحمید اطہر صاحب ندوی صدر کے عہدے پر فائز کیے گئے۔ نائب صدر اول کے طور پر مولانا سید ہاشم نظام ندوی اور جنرل سکریٹری کی اہم ترین ذمہ داری میراں معظم شاہ بندری کو تفویض کی گئی اور مولوی جعفر زیان شریف کو ادارے کا سکریٹری بنایا گیا۔نائب صدر دوم مولانا سمعان خلیفہ ندوی بنائے گئے۔
مدیر اعلیٰ پھول کا عہدہ بھی مولانا سمعان خلیفہ کے ذمے کیا گیا۔ جب کہ حسب سابق مدیر پھول مولانا عبداللہ غازی دامداابو ندوی ہی برقرار رہے اور نائب مدیر کی ذمہ داری عکراش جوباپو کو دی گئی۔
ادارے کا اہم ترین شعبہ کہکشاں کی ذمہ داریوں میں بھی بڑی تبدیلی کی گئی۔ اس کے ڈائریکٹر اینڈ چیف (مشرف کہکشاں) کا عہدہ ادارے کے سابق نائب صدر اور شروع سے ادارے کے کاموں اور ادارے کی فکروں میں شریک محترم رحمت اللہ راہیؔ صاحب کے ذمے کیا گیا،جب کہ اس کا کنوینر مولانا جعفر صوان رکن الدین اور نائب محترم نوفل دامودی کو بنایا گیا۔
ادارہ ادب اطفال بھٹکل کی نیک نامی کی اہم وجہ بچوں کی لائبریریوں کا مشن اور کتاب دوستی بھی ہے۔ نئی نسل تک مطالعۂ کتب کے فروغ کے لیے ادارے نے اب تک کئی لائبریریوں کی تعمیر میں حصہ لیا اور مختلف علاقوں کے بچوں کو مطالعہ بیداری مہم سے جوڑ کر علم پروری اور کتاب دوستی کی طرف راغب کیا۔ اس کام کے لیے ادارے میں شعبۂ کتب خانہ کا پلیٹ فارم ہے۔انتخابات میں اس کے ذمہ دار مولانا آفاق ندوی بنائے گئے۔
اسی طرح بچوں کی تنظیم کاروان اطفال کی ذمہ داری مولانا عبداللہ غازی اور مولانا عبدالمقیت درگا کو سونپی گئی۔ نوجوانوں کا شعبہ کاروان شباب کی ذمہ داری مولانا معظم شاہ بندری اور مولوی سفیان سیفی کو دی گئی۔
کسی بھی ادارے میں مالی مسائل کا حل ایک چلینج ہوتا ہے، ادارہ ادب اطفال اس معاملے میں بڑی حد تک کوتاہ دیکھا گیا ہے،اس کے حل کے لیے گزشتہ میعاد میں شعبۂ مالیات بھی بنایا گیا،اس بار اس کی ذمہ داری مولانا عبدالمقیت ڈی اور جناب رمیز کولا کے سپرد کی گئی ہے۔ جب کہ ادارے کے خزانچی اشفاق کولا صاحب اور محاسب مولانا شہروز رکن الدین بنے ہیں۔
پانچ سال سے ادارہ کتابوں کی اشاعت میں بھی سرگرم ہے، ادارے کے تحت نشریات کے شعبہ بچوں کی تعلیمی،اخلاقی اور فکری کتابیں شائع کرتا ہے اور ملک بھر کے کتاب میلوں میں بھی شرکت کرتا ہے، نشریات کی کتابیں بہت شوق سے پڑھی جاتی ہیں،اس کی ذمہ داری بھی انتہائی اہم ہوتی ہے۔ اس کی نظامت کے لیے مولوی ریاض الرحمن اکرمی اور دہلی سے نمائندگی کرنے والے رکن شوری مولانا اجمل فاروق ندوی مقرر کیے گئے۔
امید ہے کہ ادارے کے تمام عہدیداران بساط بھر کوشش کرکے ادارے کی تعمیر و ترقی میں اہم کردار ادا کریں گے۔اور ادارے کا تعمیری منصوبہ بھی اس میعاد میں مکمل ہوگا۔
اللہ تعالی ادارے کا حامی و مددگار ہو۔
رپورٹ : دفتر ادارہ ادب اطفال بھٹکل
