بھٹکل(فکروخبرنیوز) بھٹکل کی مخدوم کالونی میں واقع مسجد سعد بن خالد کے زیرِ اہتمام خواتین کے لیے 24 جون بروز بدھ پرمسرت تقریبِ تکمیلِ حفظِ قرآن کریم کا انعقاد کیا گیا۔ یہ تقریب مکتب کی طالبہ محترمہ عائشہ شہرین بنت محمد حسین جوکاکو کے اعزاز میں منعقد ہوئی، جنہوں نے حفظِ قرآن کی سعادت حاصل کی ہے۔ واضح رہے کہ عائشہ شہرین اس مسجد کے زیرِ اہتمام چلنے والے شبینہ مکتب کی سب سے پہلی (اولین) حافظہ بننے کا منفرد اعزاز حاصل کر چکی ہیں، جو پورے محلے اور ادارے کے لیے انتہائی فخر کا باعث ہے۔
اس پروقار دینی تقریب میں جہاں مکتب کی طالبات اور خواتین نے بڑی تعداد میں شرکت کی، وہیں شبینہ مکتب کے طلبہ اور بالخصوص نرسری کے ننھے منے بچوں نے انتہائی خوبصورت اور دلنشین تعلیمی و تربیتی پروگرام پیش کیے، جنہیں حاضرین نے خوب سراہا۔ تقریب کے دوران ممتاز عالمِ دین اور امام و خطیب جامع مسجد بھٹکل مولانا عبد العلیم خطیب ندوی نے مہمانِ خصوصی کی حیثیت سے شرکت کی اور قرآن کریم کی عظمت و اہمیت کے موضوع پر گراں قدر اور فکر انگیز خطاب فرمایا۔ انہوں نے مسلم خواتین پر زور دیا کہ وہ قرآن مجید سیکھنے، سمجھنے اور اسے اپنی زندگیوں میں نافذ کرنے کی طرف خصوصی توجہ دیں۔ بعد ازاں جامعۃ الصالحات بھٹکل کی معلمہ نسیمہ صاحبہ نے ختمِ قرآن کی سعادت حاصل کی اور ان کی رقت آمیز دعاؤں پر خواتین کا یہ سیشن اختتام پذیر ہوا۔
اس خوشی کے موقع پر اولین حافظہ طالبہ عائشہ شہرین، مکتب کی محنتی معلمہ اور پروگرام پیش کرنے والی دیگر بچیوں کو گراں قدر انعامات، مومینٹو اور تحائف سے نوازا گیا۔ تقریب کے اختتام پر مسجد کے صدر مولانا شجاع الدین ندوی نے تمام مہمانوں، ماؤں بہنوں اور شرکاء کا شکریہ ادا کیا۔ انہوں نے اس پورے پروگرام کو منظم اور کامیاب بنانے پر مسجد کمیٹی کے اراکین، انتظامیہ اور محلے کے سرگرم نوجوانوں کے جذبے کی ستائش کی جنہوں نے اس دینی محفل کے لیے بڑھ چڑھ کر خدمات انجام دیں۔ تمام حاضرین کے لیے ضیافت اور تواضع کے ساتھ یہ بابرکت مجلس اختتام کو پہنچی۔
