عالمی شہرت یافتہ برازیلین فٹبال لیجنڈ اور ریال میڈرڈ کے سابق اسٹار رابرٹو کارلوس کے مبینہ طور پر دائرہ اسلام میں داخل ہونے کی اطلاعات سامنے آئی ہیں। بین الاقوامی میڈیا ذرائع کے مطابق یہ دعویٰ ترکیہ کی حکمراں جماعت جسٹس اینڈ ڈیولپمنٹ پارٹی (اے کے پارٹی) کے رکن پارلیمنٹ علی شاہین نے برازیل کے شہر ساؤ پالو میں مسلم کمیونٹی کے رہنماؤں کے ساتھ ملاقات کے بعد کیا। اس خبر کے منظر عام پر آتے ہی دنیا بھر کے کھیلوں اور مسلم حلقوں میں خوشی اور مسرت کا اظہار کیا جا رہا ہے।
ترک رکن پارلیمنٹ علی شاہین کے مطابق انہیں اس پیش رفت سے برازیل کی نیشنل ایسوسی ایشن آف اسلامک جیورسٹس کے نائب صدر اور معروف مذہبی رہنما شیخ جہاد حمادہ نے آگاہ کیا। انہوں نے بتایا کہ رابرٹو کارلوس گزشتہ کچھ عرصے سے شیخ جہاد حمادہ سے مسلسل رابطے میں تھے اور تقریباً چار ہفتے قبل انہوں نے برازیل میں ان سے بالمشافہ ملاقات کی، جہاں انہوں نے باضابطہ طور پر کلمہ شہادت پڑھ کر اسلام قبول کیا। یہ اعلان ساؤ پالو میں ‘اسلامک چیریٹیبل یوتھ لیگ آف برازیل’ کے مرکز میں منعقدہ ایک اہم اجلاس کے دوران سامنے آیا، جس میں برازیل کی مختلف مسلم تنظیموں اور مساجد کے نمائندے شریک تھے۔ علی شاہین نے سوشل میڈیا پر رابرٹو کارلوس کو اسلام قبول کرنے پر مبارکباد پیش کرتے ہوئے ان کے اور ان کے اہل خانہ کے لیے امن، صحت اور سلامتی کی دعائیں کیں۔
53 سالہ رابرٹو کارلوس کو فٹبال کی تاریخ کے عظیم ترین لیفٹ بیکس میں شمار کیا جاتا ہے، جنہوں نے برازیل کو 2002 کا ورلڈ کپ جتوانے میں کلیدی کردار ادا کیا تھا اور ہسپانوی کلب ریال میڈرڈ کے ساتھ لا لیگا اور چیمپیئنز لیگ کے متعدد ٹائٹلز جیتے। انہوں نے 2007 سے 2009 کے دوران ترکیہ کے مشہور کلب فینرباخچے کی نمائندگی بھی کی تھی جہاں سے ان کے مسلم دنیا کے ساتھ گہرے تعلقات قائم ہوئے। دستیاب رپورٹس کے مطابق رابرٹو کارلوس نے کچھ عرصہ قبل ہسپانوی لیگ سے وابستہ مراکشی نژاد فٹبال ایجنٹ سہیلہ الطاہری سے بھی شادی کی ہے۔
اگرچہ برازیل کے سرکردہ مسلم رہنماؤں اور ترک پارلیمنٹیرین کی جانب سے اس پیش رفت کی مکمل تصدیق کی گئی ہے، تاہم خود رابرٹو کارلوس یا ان کے نمائندوں کی جانب سے تاحال کوئی براہ راست عوامی یا تحریری بیان جاری نہیں کیا گیا ہے। فٹبال شائقین اور عالمی سطح پر مسلم کمیونٹی اس خبر کو ایک مثبت اور تاریخی پیش رفت کے طور پر دیکھ رہی ہے، جبکہ خود کھلاڑی کی جانب سے باضابطہ تصدیقی بیان کا انتظار کیا جا رہا ہے۔
