بھٹکل تعلقہ اسٹیڈیم میں یومِ آزادی کی مرکزی تقریب ، مارچ پاسٹ میں علی پبلک اسکول نے حاصل کیا دوسرا مقام

بھٹکل (فکروخبر نیوز) ملک کے 80ویں یومِ آزادی کے موقع پر بھٹکل کے وائی ایم ایس اے گراؤنڈ، تعلقہ اسٹیڈیم میں مرکزی پرچم کشائی تقریب کا انعقاد کیا گیا، جس میں پولیس محکمہ کے ساتھ شہر کے مختلف تعلیمی اداروں کے اسکواڈ نے بھی بھرپور شرکت کی۔ تقریب کے دوران طلبہ اور پولیس دستوں کی جانب سے پیش کیا گیا مارچ پاسٹ خاص توجہ کا مرکز رہا، جسے افسران اور عوام نے خوب سراہا۔

مارچ پاسٹ کے مقابلے میں آنند آشرم اسکول نے اول، علی پبلک اسکول بھٹکل نے دوم اور بینا وئیدیا اسکول نے سوم مقام حاصل کیا۔ طلبہ نے مارچ پاسٹ میں نہایت منظم، پُراعتماد اور دلکش انداز میں اپنی شرکت پیش کی، جس پر حاضرین نے طلبہ کی بھرپور حوصلہ افزائی کی۔

تقریب میں بھٹکل کے رکن اسمبلی منکال وئیدیا، اسسٹنٹ کمشنر اور دیگر سرکاری افسران، عوامی نمائندے، پولیس اہلکار، تعلیمی اداروں کے ذمہ داران، اساتذہ اور طلبہ موجود تھے۔

اسکول کے بانی وروحِ رواں مولانا محمد الیاس ندوی اور دیگر ذمہ داران سمیت اساتذہ نے ان طلبہ کو خصوصی مبارکباد پیش کی۔