بھٹکل (فکروخبر نیوز): رحمت آباد فرینڈز فورم (RFF) بھٹکل کے زیر اہتمام 20 اگست کو مسجد ابوبکر صدیقؓ میں نعتیہ مقابلے کا انعقاد کیا گیا، جس میں بیندور سے ولکی تک کے طلبہ اور نوجوانوں نے جوش و خروش کے ساتھ شرکت کی۔ مقابلے میں مجموعی طور پر 69 شرکاء نے حصہ لیا، جن میں 46 طلبہ سفلیٰ (جونیئر) گروپ اور 23 طلبہ علیا (سینئر) گروپ سے تھے۔ ابتدائی مرحلے کے بعد دونوں گروپوں سے آٹھ، آٹھ یعنی مجموعی طور پر 16 شرکاء کو فائنل مرحلے کے لیے منتخب کیا گیا۔
پروگرام کا آغاز حافظ احمد بن ندیم کوبٹے کی تلاوتِ قرآن پاک سے ہوا، جبکہ مولوی قاسم خیال نے استقبالیہ کلمات پیش کیے۔ اس کے بعد منتخب شرکاء نے اپنی خوبصورت آواز میں نعتیں پیش کیں۔
مہمانِ خصوصی مولانا مقبول احمد کوبٹے ندوی نے سیرتِ نبوی ﷺ کے اہم پہلوؤں پر روشنی ڈالتے ہوئے نبی کریم ﷺ کی حیاتِ مبارکہ کو سمجھنے اور اس کی تعلیمات کو اپنی عملی زندگی میں اپنانے کی ضرورت پر زور دیا۔ مولانا سمعان خلیفہ ندوی اور مولانا نعمت اللہ عسکری ندوی نے بھی سیرتِ رسول ﷺ کے مختلف پہلوؤں اور اس کے عملی اسباق پر خطاب کیا۔مقابلے کے نتائج کے مطابق سفلیٰ گروپ میں محمد ریان بن راشد قاضی نے اول، محمد عبیدہ بن نور الصباح عبیدہ منکی نے دوم اور علی بن مولانا اواب اکرمی نے سوم مقام حاصل کیا۔ علیا گروپ میں انس بن مولانا مصدق ہلارے نے اول، شماس ابوحسینا منکی اور عبدالـمبدی بن مولانا عرفان ایس ایم نے مشترکہ طور پر دوم، جبکہ عثمان غنی ہلارے بن مقیم ہلارے نے سوم مقام حاصل کیا۔
تمام شرکاء کو ان کی شرکت اور محنت کے اعتراف میں انعامات سے نوازا گیا۔ نتائج کا اعلان مولوی نصیر طاہر باپو نے کیا۔
اس موقع پر رحمت آباد فرینڈز فورم کی ویب سائٹ rffbhatkal.in کا بھی باضابطہ افتتاح کیا گیا۔ محمد احمد صدیقہ کی تیار کردہ ویب سائٹ پر فورم کے مشن و وژن، سرگرمیوں، کارناموں اور مجلسِ منتظمہ کے اراکین سے متعلق معلومات فراہم کی جائیں گی۔تقریب میں مولانا رحمت اللہ رکن الدین ندوی، مولانا مقبول احمد کوبٹے ندوی، مولانا سمعان خلیفہ ندوی، مولانا نعمت اللہ عسکری ندوی، افاق نائطے، ابوبکر بائیدہ، مولانا احمد بائیدہ، مولانا حسن البنا اکرمی سمیت دیگر علماء، ذمہ داران، شرکاء، منتظمین اور سرپرستوں نے شرکت کی۔ اختتام پر صدرِ مجلس مولانا رحمت اللہ رکن الدین ندوی نے صدارتی خطاب کیا، جبکہ مولانا نعمت اللہ عسکری ندوی کی دعا پر پروگرام اختتام پذیر ہوا۔
