بھٹکل (فکروخبرنیوز) رحمت آباد میں جامعہ آباد روڈ کی خستہ حالی اور پینے کے پانی کی شدید قلت کے مسائل پر ‘رحمت آباد فرینڈز فورم’ (RFF) نے سخت تشویش کا اظہار کرتے ہوئے ضلعی انتظامیہ سے فوری مداخلت کی اپیل کی ہے۔ فورم کے ایک وفد نے اتر کنڑا کی ڈپٹی کمشنر (ڈی سی) محترمہ لکشمی پریا سے ان کے کاروار واقع دفتر میں ملاقات کی اور ان کے سامنے دو الگ الگ یادداشتیں پیش کر کے فوری حل کا مطالبہ کیا۔
پہلی یادداشت میں فورم نے تینگنگنڈی کراس سے رحمت آباد اور تینگنگنڈی پورٹ کی طرف جانے والی پی ڈبلیو ڈی سڑک (جامعہ آباد روڈ) کی بدتر صورتحال کی طرف توجہ مبذول کرائی۔ وفد نے ڈی سی کو بتایا کہ اس سلسلے میں ستمبر کے پہلے ہفتے میں بھی اسمبلی کے ڈپٹی اسپیکر و مقامی ایم ایل اے منکال ایس ویدیا، اسسٹنٹ کمشنر، تحصیلدار اور پی ڈبلیو ڈی کے اعلیٰ حکام کو یادداشتیں پیش کی گئی تھیں۔ تاہم طویل وقت گزر جانے کے باوجود اب تک سڑک کی مرمت یا بحالی کا کوئی عملی کام شروع نہیں ہو سکا ہے۔ بارش کے موسم میں پانی کے جمع ہونے سے پیدا ہونے والی مشکلات کے بعد اب شدید گرد و غبار نے علاقہ کے مکینوں کا جینا دو بھر کر دیا ہے جس سے عوامی صحت پر بھی سنگین اثرات مرتب ہو رہے ہیں۔ فورم نے سڑک کی فوری مرمت، ڈرینیج کے معقول نظام اور دھول پر قابو پانے کے اقدامات کا مطالبہ کیا۔
دوسری یادداشت میں فورم نے رحمت آباد میں پینے کے پانی کی باقاعدہ اور مناسب فراہمی کا اہم مسئلہ اٹھایا۔ فورم کے مطابق علاقے کے ایک بڑے حصے میں واٹر پائپ لائن کا ڈھانچہ موجود ہے اور گھروں میں کنکشن بھی دیے گئے ہیں، اس کے باوجود رہائشیوں کو پانی کی شدید قلت اور بے قاعدگی کا سامنا ہے۔ فورم نے ضلعی انتظامیہ سے درخواست کی کہ اس بنیادی مسئلے کو ترجیحی بنیادوں پر حل کیا جائے۔
اس موقع پر آر ایف ایف کے ایگزیکٹو ممبران جریر حسن شوپا، انظف قاضی، احمد ایم ایس، عبدالمنان، مولوی ابوبکر صدیق، عکراش منیری، تنظیم، سید سنان ایس جے کے علاوہ رحمت آباد کے باشندے ابوبکر بائیدہ اور یحییٰ رکن الدین موجود تھے۔
