ھٹکل (فکروخبرنیوز) بھٹکل کے مختلف وارڈوں میں پینے کے پانی کی پائپ لائن بچھانے کے لیے کھودی گئی سڑکوں کی فوری مرمت اور انہیں پرانی حالت میں بحال کرنے کا مطالبہ زور پکڑنے لگا ہے۔ اس سلسلے میں بھٹکل پورسبھا (بلدیہ) کے سابق ارکان کے ایک وفد نے وارڈ نمبر 20 اور 21 کے شہریوں کی بابت بلدیہ کے چیف آفیسر کو ایک اہم میمورنڈم سونپا ہے۔ وفد نے انتظامیہ کو خبردار کیا ہے کہ اگر مانسون کی بارشوں کے آغاز سے قبل ان سڑکوں کو درست نہ کیا گیا تو مقامی عوام کے لیے صورتحال انتہائی سنگین ہو جائے گی۔
موصولہ اطلاعات کے مطابق شہر کے وارڈ نمبر 20 اور 21 کے تحت آنے والے اہم تجارتی اور رہائشی علاقوں بشمول شبیر اسٹریٹ، شوکت علی روڈ، تکیہ اسٹریٹ، غوثیہ اسٹریٹ اور فاروقی اسٹریٹ میں مرکزی حکومت کی ‘امرت 2.0 اسکیم’ (Amrut 2.0) کے تحت پینے کے پانی کے پائپ بچھانے کا کام کیا گیا تھا۔ تاہم پائپ لائن ڈالنے کے بعد متعلقہ محکمے اور ٹھیکیدار نے سڑکوں کو اسی طرح ادھورا چھوڑ دیا۔ سڑکوں کی مناسب مرمت نہ ہونے کی وجہ سے کئی جگہوں پر خطرناک گڑھے بن گئے ہیں اور گاڑیوں کی آمدورفت کے باعث دھول مٹی کا طوفان اٹھ رہا ہے، جس سے راہگیروں اور دکانداروں کا جینا محال ہو گیا ہے۔ وفد نے مطالبہ کیا ہے کہ بارش کا پانی ان گڑھوں میں جمع ہونے سے قبل انٹر لاکنگ، ڈامر کاری یا بجری ڈال کر سڑکوں کو فوری طور پر قابلِ استعمال بنایا جائے تاکہ کسی بھی بڑے حادثے سے بچا جا سکے۔
اس موقع پر کونسلر فیاض ملا اور دیگر موجود تھے۔
