جمعہ 1446/03/24هـ (27-09-2024م)
برسوں لگی رہے ہیں جب مہر و مہ کی آنکھیں ** تب کوئی ہم سا صاحب صاحب نظر بنے ہے
کہتے ہیں آج سے ستر برس پہلے بھٹکل کی سرزمین بدعات اور من گھڑت رسومات کی وجہ سے بے نور ہوگئی تھی، سورج ہر دن طلوع ہوتا اور ضیا پاشی کرتا، اس کی کرنیں ہر گھر میں داخل ہوتیں، رات میں موم کی بتیاں یا تیل کی مدد سے جلنے والی چمنیاں اندھیروں سے برسر پیکار رہتیں، صبح کی خنک ہوائیں راہ گیروں کو، گھر کے باہر مختلف مشاغل میں مصروف مرد عورتوں کو ٹھنڈک پہنچاتیں، غربت اور افلاس کی گرد اگرچہ اکثر چہروں پر اٹی رہتی مگر اطمینان اور تشکر کی صفت دلوں میں پائی جاتی تھی، بارش کے موسم میں جب موسلا دھار بارش ہوتی، زمین سبزے کا ستر پہن لیتی اور ہر جگہ رنگ برنگے پھول کھلتے اور آنکھوں کو فرحت بخشتے تھے، ناریل کے درختوں پر کثرت سے ناریل کی پیداوار ہوتی، اور دسیوں قسم کے پکوان اس کے ذریعے تیار ہوتے تھے، اتنے قسم کے ناشتے بنائے جاتے دوسرے شہر والوں نے چشم تصور سے بھی نہ دیکھا ہوگا، عصری علوم کا ایک ادارہ انجمن حامی مسلمین قائم تھا جو روشنی بکھیر رہا تھا، کئی دلوں میں امید کے دیے جلا رہا تھا، جس کا بانی دین کی محبت اور رسول کی عقیدت سے سرشار تھا، قوم کی خدمت کے جذبے سے شرابور تھا، عوام کی نگاہوں سے دین کا شفاف اور منور چہرہ اب تک مخفی تھا، آبادی بھی کچھ زیادہ نہ تھی، یہاں وہاں منتشر گھر آباد تھے جن سے سادگی اور فقر مترشح تھا، دولت کی گنگا ایک دو گھر کے آنگن میں بہتی ہو تو ہو ورنہ کھانے کے لیے روٹی اور پہننے کے لیے کپڑا میسر تھا، مدرسے کے نہ ہونے کی وجہ سے لوگوں میں دین داری نہ تھی، دین سے محبت تو تھی مگر ان بدعات اور رسومات کو بھی چھوڑنے کے لیے تیار نہ تھے، تیار نہ تھے ؟ وہ تو اسے دین کا حصہ سمجھتے تھے، اہل بدعت کے یہاں اب جو باتیں رائج ہیں ان کو تصور میں لائیے، میں کن کن کا تذکرہ کروں، بیچارے مجبور بھی تھے، صحیح روشنی ملتی کہاں سے؟ کوئی مدرسہ نہیں! حافظ نہیں! مولوی نہیں! کچھ افراد تھے جن کو تھوڑی بہت دین کی معلومات حاصل تھیں، وہ دینی قیادت سنبھالے ہوئے تھے، کچھ افراد میں فکرمندی اور حمیت دینی جوشاں اور خروشاں تھی، اس مسئلہ کے حل کے لیے مسلسل کد و کاوش کر رہے تھے، آخر ایک دن ایک مکان پر جامعہ کے نام سے مدرسہ کی بنا رکھی گئی، پڑھنے کے لیے طلبا دو تین! ان میں ایک لڑکا وہ تھا جو محی الدین منیری کے بیان سے متاثر ہوکر یہاں آیا تھا، اپنے خاندان والوں سے لڑ کر آیا تھا، بہت ہوشیار تھا، ذہن چالاک اور جذبۂ بیباک سے مخمور تھا، اسکول کے اساتذہ اس کی استعداد کے معترف تھے، خاندان والے کہہ رہے تھے: کیوں اپنے مستقبل کو تاریک کر رہے ہو؟ مدرسے میں پڑھ کر کیا ملنے والا ہے؟ مگر اس کے دل میں اطمینان اور ذہن میں سکون برقرار تھا، ندوے کی طرف سے مولانا عبد الحمید ندوی بھی بھیجے گئے تھے، سال گزرتے گئے اور وہ لڑکا اپنے ترقی کے مدارج طے کرتا رہا، اسکے بعد اعلی تعلیم کے لیے ندوے بھی گیا اور کچھ سال پڑھ کر آیا، کہتے ہیں: علی گڑھ میں ادیب کامل کی سند بھی حاصل کی، جو اس زمانے میں انتہائی قابل ذکر بات تھی، چہرے پر داڑھی اور علم کا نور، دل میں اپنے وطن کی قسمت کو چمکانے کا عزم مصمم!
جواب دیں