بھٹکل (فکروخبر نیوز) ایسوسی ایشن فار پروٹیکشن آف سول رائٹس (APCR) کے ایک اہم اجلاس میں تنظیم کی اترا کنڑ ضلع کی نئی کمیٹی کی منظوری دے دی گئی۔ اجلاس بھٹکل میں منعقد ہوا، جس کی صدارت کرناٹک ہائی کورٹ کے سینئر ایڈوکیٹ اور اے پی سی آر کرناٹک کے جنرل سکریٹری ایڈوکیٹ سید اکمل رضوی نے کی۔ اس موقع پر انہوں نے تنظیمی ذمہ داریوں، شہری حقوق کے تحفظ اور مؤثر قیادت کے حوالے سے تفصیلی رہنمائی کی۔
اجلاس میں نئی ضلعی کمیٹی کا اعلان کرتے ہوئے جناب قمر الدین مشائخ کو صدر، جناب انعام علاء کو نائب صدر، جناب اسماعیل راجہ کو جنرل سکریٹری، جناب امداد کو جوائنٹ سکریٹری اور جناب معبود آصف کو خزانچی منتخب کیا گیا۔
اپنے خطاب میں ایڈوکیٹ اکمل رضوی نے کہا کہ شہری حقوق کے تحفظ کی جدوجہد میں خوف سے بالاتر ہو کر کام کرنا تنظیمی ذمہ داران کی بنیادی ذمہ داری ہے۔ انہوں نے نومنتخب عہدیداروں پر زور دیا کہ وہ آئینی و قانونی حقوق کے دفاع کے لیے جرأت، دیانت اور ذمہ داری کے ساتھ اپنی خدمات انجام دیں۔
انہوں نے مزید کہا کہ کسی بھی قانونی یا انتظامی معاملے میں سرکاری حکام کی زبانی یقین دہانیوں پر اکتفا نہ کیا جائے بلکہ ہر معاملے کو تحریری شکل میں لانے اور مکمل دستاویزی ریکارڈ محفوظ رکھنے کی عادت اپنائی جائے، تاکہ شفافیت برقرار رہے اور ضرورت پڑنے پر قانونی کارروائی میں آسانی ہو۔
ایڈوکیٹ اکمل رضوی نے تنظیم کے ڈھانچے کی وضاحت کرتے ہوئے کہا کہ اے پی سی آر ایک خودمختار تنظیم ہے اور اپنی تمام سرگرمیاں اور فیصلے آزادانہ طور پر انجام دیتی ہے۔ انہوں نے کہا کہ جماعتِ اسلامی ہند تنظیم کی سرپرستی ضرور ہے، تاہم اے پی سی آر اپنی پالیسیوں اور پروگراموں میں خودمختار حیثیت رکھتی ہے۔
انہوں نے تمام اراکین پر زور دیا کہ وہ باہمی اتحاد، منظم ٹیم ورک اور عوامی خدمت کے جذبے کے ساتھ کام کریں تاکہ ضلع اترا کنڑ میں شہری حقوق کے تحفظ کی جدوجہد کو مزید مؤثر اور مضبوط بنایا جا سکے۔ اجلاس کا اختتام تنظیم کی سرگرمیوں کو ضلع بھر میں وسعت دینے کے عزم اور دعا کے ساتھ ہوا۔
