بھٹکل؛(فکروخبرنیوز/موصولہ رپورٹ) ڈاکٹر فرزانہ فرح محتشم ،پرنسپال انجمن پری یونیورسٹی کالج برائے اناث بھٹکل کے صحافتی بیان کے بہ موجب حسب سابق، امسال بھی کالج ہٰذا کے نتائج انتہائی شاندار اور حوصلہ افزا رہے ہیں۔امتحان میں شریک 422 طالبات میں 68 نے ڈسٹنکشن، 246 نے درجہ اول میں، 57 نے درجہ دوم اور 15 طالبات نے درجہ سوم میں کامیابی حاصل کی. بیس طالبات نے اردو، سائکالوجی، بزنس اسٹڈیز، اکاونٹنسی، میتھمیٹکس اور کمپیوٹر سائنس، میں صد فیصد مارکس حاصل کیے۔ بہ حیثیت مجموعی نتیجہ ٪ 91.4 رہا ہے۔
سائنس سیکشن میں عائشہ ماہین بنت تفضل حسین جکّا نے 98.3 فی صد نشانات حاصل کر کے کالج کی سطح پر اول مقام، ضلعی سطح پر تیسرا مقام اور ریاستی سطح پر دسواں مقام حاصل کیا۔ عائشہ فکردےبنت امتیاز فکردے (٪97.3)، انعم دامودی بنت انجم مہتاب دامودی (٪94.6)، نشان حاصل کیے۔کامرس سیکشن کی ٹاپرس، مسیرہ شیخ بنت مشتاق شیخ (٪97.5)،تبسیرہ خواجہ باپو جی بنت خواجہ انصاری باپو جی (٪96.33)، امل شابندری بنت شابندری محمد عوف(٪96.16) اور تھبکے امینہ ہدیٰ بنت تھبکے عبدالرحمٰن (96.16)رہیں۔ آرٹس سیکشن میں فاطمہ سمحہ بنت محمد مجیب ایس ایم (٪96.33)، تہنیہ قاضی بنت عبدالجلیل قاضی (٪95.16) اور خیر النسا بنت ایس ایم سلطان (٪94.83) ٹاپرس رہیں۔
واضح رہے کہ سائنس کی عائشہ ماہین ریاستی سطح پر دسواں رینک اور تعلقہ سطح پر اول، ضلعی سطح پر سوم مقام حاصل کیا ہے۔جبکہ کامرس کی مسیرہ شیخ تعلقہ سطح پر دوم اور آرٹس کی طالبہ فاطمہ سمحہ نے تعلقہ سطح پر اول اور ضلعی سطح پر تیسرا مقام حاصل کیا ہے۔
کالج ہٰذا کے ان ذی شان نتائج کی کنڑا اور انگریزی اخبار نے خوب پذیرائی کی ہے۔
شہر بھٹکل میں تعلیمِ نسواں کے فروغ اور خواتین میں تعلیمی شعور کی بیداری کے لیے انجمن حامیء مسلمین بھٹکل کے زیر انتظام انجمن پری یونیورسٹی کالج برائے اناث گزشتہ چوتھائی صدی سے سرگرم عمل ہے۔ مسلسل ترقی کی راہوں پر گامزن یہ کالج اعلیٰ معیاری تعلیم کے ساتھ ساتھ غیر نصابی سرگرمیوں، شخصیت سازی اور اخلاق و کردار کی تربیت کے ضمن میں تعلقہ اور ضلعی سطح پر اپنی منفرد پہچان رکھتا ہے۔
ان شاندار نتائج پر عہدیداران و اراکینِ انجمن حامی مسلمین نے پرنسپال ڈاکٹر فرزانہ فرح محتشم اور جمیع تدریسی عملہ کی خدمات کو سراہتے ہوئے کامیاب طالبات کو مبارکباد دی ہے اور اور ان کے درخشاں مستقبل کے لیے نیک خواہشات کا اظہار کیا ہے۔
