بھٹکل (فکروخبر نیوز) انجمن الفطرہ اسکول میں ہندوستان کے 80ویں یومِ آزادی کے موقع پر ایک شاندار اور پروقار تقریب کا انعقاد کیا گیا، جس میں طلبہ نے اپنی صلاحیتوں، خود اعتمادی اور حب الوطنی کا بھرپور مظاہرہ کرتے ہوئے حاضرین سے خوب داد حاصل کی۔ تقریب کا نمایاں پہلو طلبہ کی جانب سے پیش کیا جانے والا ایک تاریخی پروگرام تھا، جس میں 1947ء سے 2026ء تک ہندوستان کے زرعی، صنعتی اور ٹیکنالوجی کے میدانوں میں ہونے والی ترقی کو نہایت خوب صورت اور منفرد انداز میں اجاگر کیا گیا۔
طلبہ نے کسان، تاجر اور آئی ٹی انجینئر کے مختلف کردار ادا کرتے ہوئے ملک کی بدلتی ہوئی تصویر کو پیش کیا اور بتایا کہ کس طرح مختلف شعبوں میں ترقی نے ہندوستان کو ایک نئے مقام تک پہنچایا ہے۔ پروگرام میں ٹیپو سلطان، مولانا ابوالکلام آزاد، اشفاق اللہ خان اور خان عبدالغفار خان جیسے عظیم مسلم مجاہدینِ آزادی کے کردار بھی طلبہ نے پیش کیے اور ان کی قربانیوں اور جدوجہد کو خراجِ عقیدت پیش کیا۔
طلبہ کی پراعتماد تقریروں، تاریخی کرداروں کے لیے اختیار کیے گئے لباس، مؤثر اداکاری اور بہترین پیشکش نے تقریب کو یادگار بنا دیا۔ حاضرین، اساتذہ اور سرپرستوں نے طلبہ کی تیاری اور ان کی صلاحیتوں کو سراہتے ہوئے پروگرام کی بھرپور پذیرائی کی۔ تقریب نے جہاں طلبہ میں حب الوطنی کے جذبات کو اجاگر کیا، وہیں ہندوستان کی تعمیر و ترقی میں مختلف طبقات کی خدمات اور بالخصوص آزادی کی جدوجہد میں مسلم مجاہدین کے کردار کو نئی نسل کے سامنے مؤثر انداز میں پیش کیا۔
