مغربی گھاٹ، جنگلات اور قدرتی وسائل کے تحفظ کے لیے سیاسی اختلافات سے بالاتر ہوکر متحدہ جدوجہد کی اپیل
یلاپور (فکروخبر نیوز) بیڈتی اور اگھناشنی ندیوں کو جوڑنے کے مجوزہ منصوبے کی مخالفت میں آج یلاپور شہر میں بڑے پیمانے پر احتجاجی مظاہرہ کیا گیا۔ سورناولی مٹھ کے سربراہ جگدگرو شری گنگادھریندر سرسوتی سوامی جی کی رہنمائی میں منعقدہ اس احتجاج کے دوران قومی شاہراہ پر راستہ روکو تحریک بھی چلائی گئی۔
’’بیڈتی اور اگھناشنی ندیوں کو بچاؤ‘‘ اور ’’مغربی گھاٹ کا تحفظ کرو‘‘ کے نعروں کے تحت منعقدہ اس احتجاج میں عوام نے قدرتی وسائل کے تحفظ کے لیے متحد ہونے کی ضرورت پر زور دیا۔
احتجاج کے دوران اس بات پر زور دیا گیا کہ اترکنڑا ضلع کی زمین، پانی، جنگلات اور مغربی گھاٹ کے قدرتی وسائل کا تحفظ ہم سب کی مشترکہ ذمہ داری ہے۔ ان وسائل کو محفوظ رکھنے کے لیے سیاسی جماعتوں اور نظریاتی اختلافات سے بالاتر ہوکر اجتماعی جدوجہد ضروری ہے۔ احتجاج کی حمایت کرنے والوں نے کہا کہ قدرتی ماحول اور ندیوں کا تحفظ کسی ایک جماعت یا طبقے کا مسئلہ نہیں، بلکہ پورے علاقے اور آنے والی نسلوں کے مستقبل سے وابستہ معاملہ ہے۔
اس موقع پر احتجاجی تحریک کی حمایت میں بڑی تعداد میں شریک ہونے والے عوام کا شکریہ بھی ادا کیا گیا اور ماحولیات کے تحفظ کی جدوجہد میں باہمی اتحاد برقرار رکھنے کی ضرورت پر زور دیا گیا۔
واضح رہے کہ بیڈتی اور اگھناشنی ندیوں کو جوڑنے کے مجوزہ منصوبوں کے خلاف اترکنڑا ضلع میں عوامی سطح پر مخالفت کی جارہی ہے اور ماحولیاتی تحفظ کے لیے مختلف حلقے ان منصوبوں کو واپس لینے کا مطالبہ کررہے ہیں۔
