متحدہ عرب امارات میں زمینی نقل و حمل کے شعبے میں ایک تاریخی پیش رفت کے تحت اتحاد ریل نے دبئی اور ابوظہبی کے درمیان مسافر ٹرین سروس کے لیے باضابطہ ٹکٹ بکنگ کا آغاز کر دیا ہے۔ دبئی میں قائم اتحاد ریل کے الیلایس اسٹیشن سے ابوظہبی کے لیے پہلی ٹرین سروس کے آغاز کے دن صبح 6 بج کر 15 منٹ پر روانہ ہوگی۔ اس نئی تیز رفتار سروس کے نتیجے میں دونوں بڑے تجارتی و انتظامی مراکز کے درمیان سفر کا دورانیہ کم ہو کر محض 64 منٹ یعنی ایک گھنٹہ چار منٹ رہ جائے گا۔
حکام کی جانب سے جاری کردہ تفصیلات کے مطابق دبئی سے ابوظہبی کے لیے کرایوں کا آغاز 39 درہم فی مسافر سے ہوگا، جو کمفرٹ سیکشن کے لیے مقرر کیا گیا ہے۔ لگژری کلاس میں سفر کرنے کے خواہشمند مسافروں کے لیے ابتدائی کرایہ 109 درہم رکھا گیا ہے۔ مسافروں کی سہولت کے پیش نظر سیور، ویلیو اور فلیکس کیٹیگریز متعارف کرائی گئی ہیں جن میں ٹکٹ کی تبدیلی اور رقم کی واپسی کے الگ الگ ضوابط شامل ہیں۔ شہری اور بین الاقوامی سیاح اتحاد ریل کی باضابطہ ویب سائٹ اور موبائل ایپلی کیشن کے ذریعے براہ راست نشستیں بک کر سکتے ہیں۔ ابتدائی مرحلے میں روزانہ چار سروسز چلانے کا منصوبہ تیار کیا گیا ہے۔
دبئی کا الیلایس اسٹیشن جمیرہ گولف اسٹیٹس کے قریب واقع ہے، جو شیخ محمد بن زاید روڈ سے متصل ہونے کے ساتھ ساتھ المکتوم انٹرنیشنل ایئرپورٹ سے سڑک کے ذریعے تقریباً 30 منٹ کے فاصلے پر ہے۔ شہری ٹرانسپورٹ کے ساتھ ربط کو مضبوط بنانے کے لیے اس اسٹیشن کو دبئی میٹرو کی ریڈ لائن پر واقع جمیرہ گولف اسٹیٹس میٹرو اسٹیشن سے ایک مخصوص پیدل پل کے ذریعے جوڑا جا رہا ہے، جس کی تعمیر فی الوقت جاری ہے۔
یہ منصوبہ متحدہ عرب امارات میں بڑے پیمانے پر جاری ریل نیٹ ورک توسیعی منصوبے کا حصہ ہے، جس کے تحت مارچ 2027 کے اختتام تک ملک بھر میں دس مسافر اسٹیشنز فعال کرنے کا ہدف مقرر ہے۔ اگرچہ موجودہ مرحلے میں دبئی میں ایک ہی اسٹیشن فعال کیا جا رہا ہے، تاہم بعد کے مراحل میں مزید چار اسٹیشنز تعمیر کیے جائیں گے۔ قبل ازیں 30 جون کو فجیرہ سے ابوظہبی کے درمیان پہلی مسافر ٹرین کامیابی سے چلائی گئی تھی جس نے تقریباً ڈھائی سو کلومیٹر کا فاصلہ ایک گھنٹہ پینتالیس منٹ میں طے کیا تھا اور پہلے ہی روز دس ہزار سے زائد ٹکٹس فروخت ہوئے تھے۔
دبئی اور ابوظہبی کے درمیان ٹرین سروس کے آغاز سے شاہراہوں پر ٹریفک کے دباؤ میں واضح کمی واقع ہوگی اور روزانہ سفر کرنے والے ہزاروں ملازمین، تاجروں اور عام شہریوں کو سستا، بروقت اور ماحول دوست متبادل میسر آئے گا۔
