بنگلورو (فکروخبر نیوز) سابق رکن پارلیمنٹ پراپجول ریونا کو بنگلورو کی پراپنا اگراہارا سنٹرل جیل میں ممنوعہ موبائل فون اور پین ڈرائیو سمیت دیگر اشیا کے ساتھ پائے جانے کے بعد جیل کی سکیورٹی پر سنگین سوالات اٹھ گئے ہیں۔ جیل میں سنٹرل کرائم برانچ (CCB) کی جانب سے کی گئی تلاشی کے دوران ایک اینڈرائیڈ موبائل فون برآمد ہوا، جبکہ ایک زیرِ سماعت قیدی پرتاپ رائے کے قبضے سے بھی موبائل فون برآمد ہونے کی اطلاع ہے۔ واقعے کے بعد متعلقہ اسسٹنٹ سپرنٹنڈنٹ کو معطل کر دیا گیا ہے اور جیل سپرنٹنڈنٹ کو وجہ بتاؤ نوٹس جاری کیا گیا ہے۔
ذرائع کے مطابق تلاشی کی کارروائی منگل کو تقریباً چار سے پانچ گھنٹے جاری رہی اور اس دوران خصوصی طور پر ہائی سکیورٹی بیرکوں اور اہم قیدیوں کے وارڈ کی جانچ کی گئی۔ پراجول کے سیل سے موبائل فون کے علاوہ پین ڈرائیو اور دیگر اشیا بھی برآمد ہوئیں۔ بعد ازاں موبائل فون کی جانچ کے دوران اس میں قابلِ اعتراض ویڈیوز اور اخبارات سے حاصل کی گئی نوجوان خواتین کی قابلِ اعتراض تصاویر کے کلپس بھی ملنے کی اطلاع سامنے آئی ہے۔
تفتیش کے دوران پراجول نے مبینہ طور پر سیل سے ملنے والی جیب ڈائری کو اپنا بتایا، جبکہ زیرِ سماعت قیدی پرتاپ رائے نے موبائل فون، چارجر اور پین ڈرائیو کو اپنی ملکیت قرار دیتے ہوئے کہا کہ وہ فون کے ذریعے اپنے رشتہ داروں اور وکیل سے رابطہ کرتا تھا۔ اس معاملے میں پرتاپ رائے کے خلاف پراپنا اگراہارا پولیس تھانے میں ایف آئی آر بھی درج کی گئی ہے۔ تفتیش کے بعد پراجول کو وی آئی پی سیل سے جنرل سیل منتقل کر دیا گیا۔
واقعے نے جیل کے اندر ممنوعہ الیکٹرانک آلات کی رسائی اور سکیورٹی انتظامات پر سوالات کھڑے کر دیے ہیں۔ محکمۂ جیل خانہ جات کے ڈی جی پی آلوک کمار کے مطابق جنوبی ڈی آئی جی کی رپورٹ کی بنیاد پر متعلقہ اسسٹنٹ سپرنٹنڈنٹ کو معطل کیا گیا ہے، جبکہ جیل میں ممنوعہ اشیا پہنچانے میں کسی اہلکار کے ممکنہ کردار سمیت دیگر پہلوؤں کی بھی تفصیلی تحقیقات جاری ہیں۔ حکام سی سی ٹی وی فوٹیج اور دیگر شواہد کا جائزہ لے رہے ہیں، اور تحقیقات مکمل ہونے کے بعد مزید کارروائی کا امکان ہے۔
واضح رہے کہ 34 سالہ پراجول ریونا کو اگست 2025 میں بنگلورو کی خصوصی عدالت نے ایک گھریلو ملازمہ سے عصمت دری کے مقدمے میں مجرم قرار دیتے ہوئےعمر قید کی سزا سنائی تھی۔ تازہ معاملہ ان کے خلاف پہلے سے موجود مقدمے سے الگ جیل کے اندر ممنوعہ اشیا رکھنے اور سکیورٹی کی خلاف ورزی سے متعلق ہے۔
