پتّور (فکروخبر نیوز) بیلتنگڈی تعلقہ کے کانئیورو گاؤں (ادینجا) میں جعلی نوٹ چھاپنے کے اڈے پر پولیس کی کامیاب کارروائی کے بعد عوام میں پھیلی بے چینی کافی حد تک ختم ہو گئی ہے۔ پولیس محکمہ نے باضابطہ وضاحت کرتے ہوئے کہا ہے کہ ملزمان ماضی میں کئی مرتبہ جعلی نوٹ چھاپنے کی کوشش کر چکے تھے، تاہم وہ اب تک ایک بھی جعلی نوٹ مارکیٹ میں جاری کرنے یا عوام تک پہنچانے میں کامیاب نہیں ہو سکے۔ پولیس کے اس بیان کے بعد ضلع بھر میں لوگوں نے اطمینان کا اظہار کیا ہے۔
تفصیلات کے مطابق یہ گروہ تقریباً ایک ماہ قبل اپیننگڈی پہنچا تھا۔ پولیس کی ابتدائی تفتیش اور ضبط شدہ سامان کی خریداری کے ریکارڈ سے معلوم ہوا ہے کہ ملزمان ابھی تک جعلی نوٹ مارکیٹ میں لانے میں کامیاب نہیں ہوئے تھے۔ وہ اپنی سابقہ ناکام کوششوں کی خامیوں کو دور کرکے ایک نئی کوشش کی تیاری میں مصروف تھے کہ اسی دوران پولیس نے بروقت کارروائی کرتے ہوئے ان کے منصوبے کو ناکام بنا دیا۔ اس مقدمے کا اہم ملزم ابراہیم اس سے قبل بھی جعلی نوٹوں سے متعلق دو مقدمات میں ملوث رہ چکا ہے اور پولیس کے مطابق وہ اس پورے نیٹ ورک کا مرکزی کردار ہے۔
پولیس کے مطابق اس کارروائی میں ایک اہم پیش رفت اس وقت سامنے آئی جب کوڈگو ضلع پولیس کی فراہم کردہ خفیہ معلومات کی بنیاد پر دکشن کنڑ پولیس نے مشترکہ کارروائی کرتے ہوئے 15 جولائی کی رات تقریباً 11:30 بجے ادینجا میں واقع ایک عمارت پر چھاپہ مارا اور سات افراد کو حراست میں لے لیا۔ پولیس ذرائع کا کہنا ہے کہ گینگ کے چند دیگر ارکان تاحال مفرور ہیں، جن کی تلاش جاری ہے۔ ان کی گرفتاری کے بعد اس پورے نیٹ ورک اور اس کے رابطوں سے متعلق مزید اہم حقائق سامنے آنے کی توقع ہے۔
