نئی دہلی (فکروخبر نیوز) موجودہ دور میں انسانیت کو درپیش فکری، اخلاقی اور تہذیبی چیلنجوں کے تناظرمیں قرآنی تعلیمات کی افادیت اور معنویت کو اجاگر کرنے کے مقصد سے مرکز تعلیم القرآن، دہلی کے زیر اہتمام 22 نومبر 2026ء بروز اتوار ایک روزہ قومی سمینار منعقد کیا جائے گا۔ سمینار کا مرکزی موضوع "عصرِ حاضر میں قرآنی تعلیمات کی معنویت” رکھا گیا ہے، جس میں ملک بھر کے علماء، محققین، دانشوروں اور اہلِ قلم کو شرکت اور علمی مقالات پیش کرنے کی دعوت دی گئی ہے۔
مرکز کی جانب سے جاری دعوت نامے میں کہا گیا ہے کہ قرآنِ حکیم اللہ تعالیٰ کی آخری کتاب ہے جو ہر دور میں انسانیت کے لیے رہنمائی کا سرچشمہ رہا ہے۔ آج جبکہ دنیا فکری انتشار، اخلاقی بحران، معاشرتی بے راہ روی اور تہذیبی کشمکش سے گزر رہی ہے، ایسے میں قرآنی تعلیمات کی روشنی میں ان مسائل کے حل کو علمی سطح پر پیش کرنا وقت کی اہم ضرورت ہے۔
سمینار کے لیے متعدد اہم موضوعات تجویز کیے گئے ہیں۔
ان میں "قرآن: ہدایتِ انسانیت کا ابدی سرچشمہ”، "عصرِ حاضر میں فکری بحران کا قرآنی حل”، "عصرِ حاضر میں اخلاقی بحران کا قرآنی حل”، "جدید تہذیبی چیلنجز اور قرآنی تعلیمات میں ان کا حل”، "قرآن: فلاحِ انسانیت کا آفاقی و جامع پیغام”، "تعمیرِ شخصیت کے قرآنی اصول”، "قرآن اور مضبوط خاندانی نظام”، "قرآنی تناظر میں خواتین کے حقوق”، "قرآن کی روشنی میں انسانی حقوق”، "قرآن کا معاشی نظام اور موجودہ اقتصادی بحران”، "ماحولیاتی تحفظ اور قرآن”، "امنِ عالم اور قرآنی تعلیمات”، "ڈیجیٹل دور کے اخلاقی چیلنجز اور قرآن”، "مصنوعی ذہانت (AI) اور جدید ٹیکنالوجی کے تناظر میں قرآنی اقدار”، "قرآن کی روشنی میں بین المذاہب تعلقات”، "قومی یکجہتی اور قرآنی اصول”، "ہندوستان کے تکثیری معاشرے میں قرآنی تعلیمات کی معنویت”، "تحریکِ فہمِ قرآن کی ضرورت اور اس کے خط و خال”، "قرآنی تعلیمات کے نفاذ کے عملی تقاضے اور راہیں”، "قرآن اور علمِ نافع کا تصور” اور "قرآنی تہذیب کی تشکیل میں علماء، دانشوران اور تعلیمی اداروں کا کردار” جیسے اہم عناوین شامل ہیں۔
مرکز تعلیم القرآن نے واضح کیا ہے کہ مقالات تحقیقی، علمی اور اصل (Original) نوعیت کے ہوں اور زیادہ سے زیادہ دس صفحات پر مشتمل ہوں۔ مقالہ کے ساتھ ایک صفحہ پر مشتمل خلاصہ (Abstract) بھی ارسال کرنا ضروری ہوگا۔ اسی خلاصہ کی بنیاد پر منتخب مقالہ نگاران کو سمینار میں اپنے مقالے کا خلاصہ پیش کرنے کا موقع فراہم کیا جائے گا۔ منتخب مقالات کو ادارتی نظرِ ثانی کے بعد مصنفین کے نام کے ساتھ کتابی شکل میں شائع کیا جائے گا۔
اعلان کے مطابق منتخب عنوان سے یکم ستمبر 2026ء تک مطلع کرنا ہوگا، جبکہ مقالہ ارسال کرنے کی آخری تاریخ 20 اکتوبر 2026ء مقرر کی گئی ہے۔
مرکز تعلیم القرآن نے ملک بھر کے اہلِ علم، اساتذہ، محققین اور قرآنی علوم سے وابستہ افراد سے اس علمی و قرآنی کاوش میں بھرپور شرکت کی اپیل کی ہے تاکہ عصرِ حاضر کے مسائل کے حل میں قرآنی تعلیمات کی رہنمائی کو مؤثر انداز میں پیش کیا جاسکے۔
مزید معلومات اور رابطہ کے لیے:
مولانا سراج الدین ندوی
ڈائریکٹر، مرکز تعلیم القرآن، دہلی
موبائل 9897334419
