بھوپال(فکروخبرنیوز) ٹرین کے ذریعے سفر کرنے والے مسافروں کے لیے ایک اہم اطلاع سامنے آئی ہے۔ اب موبائل فون میں محفوظ ٹکٹ کا اسکرین شاٹ، پی ڈی ایف فائل یا واٹس ایپ پر موصول شدہ ٹکٹ دکھانا کافی نہیں ہوگا۔ ریلوے نے غیر محفوظ (Unreserved) ٹکٹوں کے سلسلے میں قواعد کو مزید سخت کرتے ہوئے واضح کیا ہے کہ صرف اصل ڈیجیٹل ٹکٹ ہی قابلِ قبول ہوگا۔
نیوز 18 میں شائع رپورٹ کے مطابق، ریلوے کو متعدد شکایات موصول ہوئی تھیں کہ بعض افراد ایک ہی ٹکٹ کے اسکرین شاٹ یا پی ڈی ایف کو مختلف موبائل فونز پر فارورڈ کرکے کئی افراد کو ایک ہی ٹکٹ پر سفر کروا رہے ہیں، جس سے نہ صرف ریلوے کو مالی نقصان پہنچ رہا ہے بلکہ دھوکہ دہی کے واقعات میں بھی اضافہ ہو رہا ہے۔
ریلوے حکام نے واضح کیا ہے کہ ٹکٹ چیکنگ کے دوران صرف وہی ٹکٹ درست تصور کیا جائے گا جو متعلقہ ایپ میں اصل صورت میں موجود ہو۔ اسکرین شاٹ، پی ڈی ایف، فوٹو کاپی یا واٹس ایپ پر موصول شدہ ٹکٹ قبول نہیں کیا جائے گا، اور ایسی صورت میں مسافر پر جرمانہ عائد کیا جا سکتا ہے۔
بھوپال ریلوے ڈویژن کے کمرشل منیجر اور پبلک ریلیشن آفیسر نوال اگروال کے مطابق، مسافروں کو ٹرین کے اسٹیشن سے روانہ ہونے سے قبل ہی اپنا ٹکٹ خریدنا ہوگا۔ ٹرین روانہ ہونے کے بعد کی گئی بکنگ کو درست نہیں مانا جائے گا۔
ریلوے نے ایپ کے ذریعے غیر محفوظ ٹکٹ حاصل کرنے کے لیے دو سہولتیں فراہم کی ہیں۔ پرنٹ شدہ ٹکٹ کی صورت میں مسافر ایپ میں موجود ٹکٹ دکھا کر ریلوے اسٹیشن کے ٹکٹ کاؤنٹر سے اس کا پرنٹ حاصل کرسکتے ہیں۔ جبکہ پرنٹ لیس ٹکٹ کی صورت میں مسافر کو وہی موبائل فون اپنے ساتھ رکھنا ہوگا جس میں ایپ موجود ہو اور جس نمبر سے ٹکٹ بک کیا گیا ہو۔
ریلوے کا کہنا ہے کہ نئے ضوابط کا مقصد ٹکٹوں کے غلط استعمال اور دھوکہ دہی پر قابو پانا ہے تاکہ ہر مسافر درست طریقے سے ٹکٹ حاصل کرے اور ریلوے کے نظام میں شفافیت برقرار رہے۔
