مرڈیشور/بھٹکل (فکروخبر نیوز): مرڈیشور ریلوے اسٹیشن پر ڈیوٹی انجام دینے والے ایک ریلوے ملازم کی بروقت حاضر دماغی کے باعث ایک نوجوان مسافر کی جان بچ گئی۔ کونکن ریلوے نے اس جرات مندانہ اقدام کے اعتراف میں پوائنٹس مین گنپتی نائک کو 10 ہزار روپے نقد انعام اور تعریفی سند سے نوازنے کا اعلان کیا ہے۔
تفصیلات کے مطابق یہ واقعہ اتوار کی صبح اس وقت پیش آیا جب ٹرین نمبر 16312 مرڈیشور ریلوے اسٹیشن سے روانہ ہو رہی تھی۔ اسی دوران 22 سالہ مسافر محمد غفور نے چلتی ٹرین سے اترنے کی کوشش کی، جس کے نتیجے میں وہ توازن کھو بیٹھا اور پلیٹ فارم اور ٹرین کے درمیان گرنے ہی والا تھا۔
اس موقع پر ڈیوٹی پر موجود پوائنٹس مین گنپتی نائک نے فوری طور پر صورتحال کو بھانپ لیا اور غیر معمولی مستعدی کا مظاہرہ کرتے ہوئے مسافر کو مضبوطی سے پکڑ کر محفوظ مقام تک کھینچ لیا۔ ان کی بروقت کارروائی کے نتیجے میں ایک ممکنہ جان لیوا حادثہ ٹل گیا اور مسافر کی جان محفوظ رہی۔
واقعے کی سی سی ٹی وی فوٹیج سوشل میڈیا پر وائرل ہونے کے بعد عوام کی جانب سے بھی ان کی بہادری اور حاضر دماغی کو بھرپور سراہا جا رہا ہے۔
کونکن ریلوے کے چیئرمین و منیجنگ ڈائریکٹر سنتوش کمار جھا کی ہدایت پر کاروار ڈویژن کے افسران نے گنپتی نائک کو نقد انعام اور تعریفی سند پیش کی۔ کونکن ریلوے کے منگلورو ڈویژن کی پبلک ریلیشنز منیجر کے۔ سدھا کرشنامورتی نے کہا کہ گنپتی نائک کا یہ اقدام ریلوے ملازمین کے جذبۂ خدمت اور فرض شناسی کی قابلِ تقلید مثال ہے۔
