بھٹکل (فکروخبرنیوز) بھٹکل میں انڈر گراؤنڈ سیوریج (یو جی ڈی) چیمبر کی لیکیج اور بلاکیج کی وجہ سے ایک بڑا عوامی مسئلہ کھڑا ہو گیا ہے۔ ٹاؤن کے رگھوناتھ روڈ کے قریب واقع منّولی اور پشپانجلی تھیٹر کے احاطے (وارڈ نمبر 15) اور اس کے اطراف و اکناف کے علاقوں میں سیوریج کا گندا پانی پینے کے صاف پانی کے کنووں میں داخل ہو گیا ہے، جس کے نتیجے میں 50 سے زائد کنووں کا پانی آلودہ ہو چکا ہے۔ مانسون کی آمد کے پیشِ نظر مقامی باشندوں میں ڈینگو، ملیریا اور دیگر وبائی امراض پھیلنے کا شدید خوف و ہراس پایا جا رہا ہے۔
مقامی لوگوں کے مطابق راگھویندرا مٹھ کے قریب سیوریج چیمبر لیکیج کی وجہ سے گندا پانی ابل کر نالوں اور سڑکوں پر بہہ رہا ہے اور رس کر زمین دوز کنووں میں شامل ہو رہا ہے۔ گزشتہ ایک ماہ سے جاری اس ابتر صورتحال کی وجہ سے پورے علاقے میں شدید تعفن اور بدبو پھیلی ہوئی ہے، جس سے مقامی رہائشیوں اور ریلوے اسٹیشن جانے والے مسافروں کا جینا محال ہو گیا ہے۔ شہریوں کا الزام ہے کہ بلدیہ اور قومی شاہراہ کی دیکھ بھال کرنے والی آئی آر بی (IRB) کمپنی ایک دوسرے پر ذمہ داری ڈال کر پلہ جھاڑ رہے ہیں۔
برہم شہریوں نے انتباہ دیا ہے کہ اگر اس سنگین مسئلے کو فوری حل نہ کیا گیا اور آلودہ کنووں کی صفائی کا انتظام نہ ہوا، تو وہ 15 جون کو نیشنل ہائی وے جام کر کے شدید احتجاج کریں گے۔ اس موقع پر پرمیشور نائک، سریش نائک، سدھاکر نائک، دنیش نائک ، ناگراج نائک اور دیگر مقامی معززین موجود تھے۔
