بھٹکل (فکرو خبر نیوز) ساحلی کرناٹک اور خلیجی ممالک میں اپنی فلاحی و تجارتی سرگرمیوں کے لیے معروف ممتاز کاروباری شخصیت ڈاکٹر محمد میراں منیگار کو متحدہ عرب امارات کی ریاست عجمان کی مشہور ‘گلف میڈیکل یونیورسٹی’ کی جانب سے ایک پروقار تقریب میں ‘ڈاکٹر آف ہیومن لیٹرز’ (Doctor of Humane Letters) کی اعزازی ڈگری سے سرفراز کیا گیا ہے۔ سماجی کاموں اور انسانیت کی خدمت کے اعتراف میں دیئے گئے اس عظیم اعزاز کو ‘ایمکو انٹرنیشنل’ اور ‘الیکٹرک وے’ کے بانی و چیئرمین ڈاکٹر محمد میراں نے شکریہ کے ساتھ قبول کیا۔ واضح رہے کہ وہ اپنے آبائی وطن ساحلی کرناٹک بالخصوص بھٹکل میں مشہور و معروف ‘ایم ایم ریزورٹ’ کے مالک کے طور پر بھی ایک خاص پہچان رکھتے ہیں۔
اس پروقار تقریب کے دوران ڈاکٹر محمد میراں نے وہاں موجود معززین کے مجمع سے خطاب کیا، جس میں عجمان کے ولی عہدِ شیخ عمار بن حمید النعیمی، یونیورسٹی کے بانی ڈاکٹر تھمبے محی الدین اور چانسلر ڈاکٹر وینکٹ رامن منڈا جیسی شخصیات شامل تھیں۔ انہوں نے گفتگو کرتے ہوئے کہا کہ یہ اعزاز محض ان کی ذاتی کامیابی نہیں ہے بلکہ یہ ان کے تمام رضاکاروں، ہمدردوں اور دوستوں کی اجتماعی کوششوں کا منہ بولتا ثبوت ہے۔ڈاکٹر محمد میراں نے اپنے پیغام میں اس پر زور دیا کہ دنیا کے ہر انسان کو خواہ اس کا تعلق کسی بھی پس منظر سے ہو، معیاری تعلیم، بہترین طبی دیکھ بھال اور محفوظ رہائش کی سہولیات تک رسائی حاصل ہونی چاہیے۔ انہوں نے ہندوستان میں ساحلی کرناٹک کے خطے میں جاری اپنے فلاحی و خیراتی کاموں اور منصوبوں کا تذکرہ کرتے ہوئے کہا کہ ان بنیادی ضرورتوں کی فراہمی سے لوگوں کی زندگیاں بدلتی ہیں اور معاشرہ مضبوط ہوتا ہے۔ یونیورسٹی انتظامیہ نے انہیں ایک بیدار ضمیر رکھنے والے تاجر اور انسانیت کی خدمت کے لیے زندگی وقف کرنے والی ایک بہترین مثال قرار دیتے ہوئے باضابطہ طور پر خراجِ تحسین پیش کیا.اس موقع پر ‘کوسٹل کرناٹک این آر آئی فورم’ (Coastal Karnataka NRI Forum) نے بھی ڈاکٹر محمد میراں کو اس شاندار سنگِ میل کو عبور کرنے پر دل کی گہرائیوں سے مبارکباد پیش کی ہے۔ فورم کی جانب سے جاری کردہ ایک باضابطہ تہنیتی پیغام میں صدر محمد غوث خلیفہ اور جنرل سکریٹری ابو محمد مختصر نے ڈاکٹر محمد میراں کی مثالی قیادت اور معاشرے کے لیے ان کی گراں قدر خدمات کو سراہا ہے ۔
