ترواننت پورم : کیرالہ کے پتھنم تیتا ضلع میں صدرِ جمہوریہ دروپدی مرمو کی سکیورٹی میں ایک سنگین لاپرواہی سامنے آئی ہے۔ بدھ کے روز صدر کو لے جانے والا ہیلی کاپٹر سبریمالا کے پرمدم اسٹیڈیم کے ہیلی پیڈ پر اترتے ہی نرم کنکریٹ میں دھنس گیا۔ خوش قسمتی سے صدر محفوظ رہیں اور ایک ممکنہ بڑے حادثے سے بال بال بچ گئیں۔
ذرائع کے مطابق صدر مرمو بدھ، 22 اکتوبر کو سبریمالا کے مشہور ایّپا مندر کے دورے پر تھیں۔ جس ہیلی پیڈ پر ان کا ہیلی کاپٹر اترا، وہ آخری وقت میں تیار کیا گیا تھا۔ بتایا گیا ہے کہ ہیلی پیڈ پر کنکریٹ کا کام اسی صبح مکمل ہوا تھا، اور اسے خشک ہونے کے لیے مناسب وقت نہیں دیا گیا۔
نتیجتاً، جیسے ہی ہیلی کاپٹر نے زمین کو چھوا، اس کے پہیے نرم کنکریٹ میں دھنس گئے۔ فوری طور پر پولیس، فائر بریگیڈ اور تکنیکی عملہ موقع پر پہنچا، جنہوں نے کئی گھنٹوں کی مشقت کے بعد ہیلی کاپٹر کو نکالا۔ خوش قسمتی سے اس واقعے میں صدر سمیت تمام افسران محفوظ رہے۔
ذرائع کا کہنا ہے کہ محکمہ انٹیلی جنس نے ایک روز قبل ہی ریاستی انتظامیہ کو انتباہ دیا تھا کہ ہیلی پیڈ کا کنکریٹ ابھی مکمل طور پر خشک نہیں ہوا ہے، اس لیے وہاں ہیلی کاپٹر نہ اتارا جائے، تاہم انتباہ کو نظرانداز کر دیا گیا۔ بتایا جاتا ہے کہ ہیلی پیڈ کی تعمیر کا فیصلہ منگل کی شام اچانک کیا گیا تھا اور راتوں رات اس پر کام مکمل کیا گیا۔
رپورٹس کے مطابق صدر کی سبریمالا یاترا کے سلسلے میں آخری لمحات تک یہ طے نہیں ہو پایا تھا کہ وہ سڑک کے راستے جائیں گی یا ہیلی کاپٹر سے۔ اسی لیے دونوں راستوں پر سکیورٹی انتظامات کیے گئے تھے۔
