سرینگر : میر واعظ کشمیر محمد عمر فاروق نے کہا کہ کشمیریوں کی بار بار گرفتاریاں انصاف کے منافی ہے، سزا کی معیاد پورا کرنے کے باوجود انصاف کے تقاضوں کو پامال کیا جارہا ہے۔ میرواعظ ڈاکٹر مولوی محمد عمر فاروق نے ایکس پر پوسٹ میں لکھا کہ ”کشمیریوں کی بار بار گرفتاریاں جن میں سے بہت سے اپنی سزا کی معیاد پوری کر چکے ہیں، انصاف کے تقاضوں کے منافی ہے۔ نوجوانوں کو نشانہ بنایا جا رہا ہے۔
انہوں نے مزید کہا کہ ’گرفتار شدگان کے اہل خانہ مجھ سے غم اور اضطراب کے ساتھ رابطہ کر رہے ہیں۔ اس طرح کی اذیت رسانی لوگوں کے زخموں کو اور گہرا اور بے اعتمادی اور غصے کو جنم دیتی ہے۔ انہوں نے حکام سے اپیل کی کہ وہ سزا دینے کے اس رویہ کو ختم کریں۔ عوام کے منتخب نمائندے اس صورتحال پر تماشائی بن کر نہیں رہ سکتے۔ اُن پر لازم ہے کہ وہ اپنی ذمہ داری پوری کریں اور اس بات کو یقینی بنائیں کہ عوام کے بنیادی حقوق کا تحفظ ہو۔
واضح رہے کہ گذشتہ جمعہ 16 مئی کو میرواعظ کشمیر مولوی محمد عمر فاروق نے سرینگر جامع مسجد میں خطاب کرتے ہوئے کہا تھا کہ ’جموں و کشمیر کے عوام جنگ نہیں بلکہ امن چاہتے ہیں۔ انہوں نے افسوس کا اظہار کرتے ہوئے کہا تھا کہ ’آج کل سچ بولنا اور حقیقت کا اظہار بھی غداری سمجھا جاتا ہے‘۔
