بنگلورو: کرناٹک کے سابق ڈائریکٹر جنرل آف پولیس (ڈی جی پی) اوم پرکاش اتوار کو اپنی رہائش گاہ پر پُراسرار حالات میں مردہ پائے گئے۔ پولیس کے مطابق ان کے جسم پر چاقو کے 10 سے زائد زخم تھے۔ اس واقعے کے بعد ان کی اہلیہ پالاوی اور بیٹی کرِتی کے خلاف قتل کا مقدمہ درج کر لیا گیا ہے۔
ڈیکن ہیرالڈ کی رپورٹ کے مطابق، 69 سالہ اوم پرکاش کو پیٹ، سینے اور ہاتھوں پر متعدد بار چاقو سے وار کیا گیا۔ دی ہندو نے پولیس ذرائع کے حوالے سے بتایا کہ جائے وقوعہ سے ایک تیز دھار آلہ برآمد ہوا ہے۔
پولیس کو یہ اطلاع اتوار کی شام تقریباً 4:30 بجے ایچ ایس آر لے آؤٹ میں واقع ان کی رہائش گاہ سے ملی۔ پولیس نے بتایا کہ شکایت اوم پرکاش کے بیٹے کارتیکیش نے درج کروائی، جس کی بنیاد پر ایف آئی آر درج کر کے تحقیقات کا آغاز کر دیا گیا ہے۔
پولیس افسران کے مطابق واردات کے وقت اوم پرکاش اپنی اہلیہ پالاوی اور بیٹی کرِتی کے ساتھ گھر پر موجود تھے۔ اطلاع ہے کہ دونوں خواتین پولیس کے آنے سے قبل خود کو ایک کمرے میں بند کر چکی تھیں۔
ابتدائی تفتیش کے مطابق، اوم پرکاش اور ان کی اہلیہ کے درمیان اتوار کو کسی بات پر جھگڑا ہوا، جو شدت اختیار کرتے ہوئے ان کے قتل پر منتج ہوا۔ بیٹی کرِتی بھی اس وقت گھر میں موجود تھیں۔
ڈیکن ہیرالڈ کے مطابق، کارتیکیش نے پولیس کو بتایا کہ ان کے والد کچھ دنوں سے اپنی بہن کے گھر مقیم تھے کیونکہ پالاوی نے انہیں مبینہ طور پر جان سے مارنے کی دھمکیاں دی تھیں۔ جمعہ کے روز کرِتی انہیں واپس گھر لے کر آئی تھیں۔
پولیس نے پالاوی کو حراست میں لے کر پوچھ گچھ شروع کر دی ہے، تاہم تاحال کسی کو باقاعدہ گرفتار نہیں کیا گیا۔ ایڈیشنل کمشنر آف پولیس (ویسٹ) وکاش کمار وکاش نے بتایا کہ "ابتدائی شواہد سے لگتا ہے کہ معاملہ گھریلو نوعیت کا ہے۔”
واضح رہے کہ اوم پرکاش بہار کے ضلع چمپارن سے تعلق رکھتے تھے اور 1981 بیچ کے انڈین پولیس سروس (آئی پی ایس) افسر تھے۔ وہ 2015 میں کرناٹک کے ڈی جی پی بنے اور 2017 میں ریٹائر ہوئے۔
