بنگلور (فکروخبر نیوز) بھٹکل مسلم جماعت بنگلور کے زیرِ اہتمام ’’نَمّا ملن 26‘‘ کے عنوان سے ایک خصوصی پروگرام ایک نجی خوبصورت ہال میں منعقد ہوا، جس میں بھٹکل سے تعلق رکھنے والے افراد نے بڑی تعداد میں شرکت کی۔ پروگرام میں تعلیمی میدان میں نمایاں کامیابی حاصل کرنے والے طلبہ کی حوصلہ افزائی، معروف شخصیت مولانا عبدالعظیم قاضیا ندوی کی تہنیت، بچوں کی مختلف سرگرمیوں اور طبی امداد کے لیے فنڈ جمع کرنے کی منفرد کوشش سمیت متعدد پروگرام پیش کیے گئے۔
پروگرام کے آغاز سے قبل قرأت، اذان، فینسی ڈریس اور مختلف کھیلوں کے مقابلوں میں نمایاں کارکردگی کا مظاہرہ کرنے والے بچوں اور دیگر شرکاء کے ناموں کا اعلان کیا گیا اور انہیں انعامات سے نوازا گیا۔ پروگرام کی پہلی نشست کی نظامت جناب اشرف شاہ بندری نے جبکہ دوسری نشست کی نظامت جناب فیضان برماور نے انجام دی۔
اس موقع پر بھٹکل مسلم جماعت بنگلور کے جنرل سکریٹری جناب سالم کولا نے استقبالیہ کلمات پیش کرتے ہوئے مہمانان اور شرکائے پروگرام کا خیرمقدم کیا۔
پروگرام میں بنگلور میں تعلیمی میدان میں نمایاں نمبرات سے کامیابی حاصل کرنے والے طلبہ کی بھی حوصلہ افزائی کی گئی۔ جناب فائز شنگیری نے نمایاں کامیابی حاصل کرنے والے طلبہ کے ناموں کا اعلان کیا، جس کے بعد اسٹیج پر موجود مہمانان کے ہاتھوں انہیں انعامات سے نوازا گیا۔
طلبہ کی پینٹنگز کی نیلامی، طبی امداد کے لیے رقم مختص کرنے کا اعلان
’’نَمّا میلان 26‘‘ کی ایک خاص بات طلبہ کی جانب سے تیار کردہ مختلف پینٹنگز کی نیلامی تھی۔ ان پینٹنگز کو شرکائے پروگرام نے دلچسپی کے ساتھ خریدا اور نیلامی کے ذریعے حاصل ہونے والی رقم کو طبی امداد (میڈیکل پرپس) کے لیے استعمال کرنے کا اعلان کیا گیا۔
نیلامی کے دوران شرکاء نے غیر معمولی دلچسپی کا مظاہرہ کیا اور دل کھول کر بولیاں لگائیں۔ بعض افراد خصوصاً خواتین نے نیلامی کی رقم کے علاوہ بھی طبی امداد کے لیے اپنی جانب سے عطیات دینے کا اعلان کیا، جس سے پروگرام کے سماجی و فلاحی پہلو کو مزید تقویت ملی۔
مولانا عبدالعظیم قاضیا ندوی کی تہنیت
پروگرام میں بھٹکل کی معروف شخصیت اور جامعہ اسلامیہ بھٹکل کے اولین فارغین میں شمار ہونے والے سابق نائب قاضی مولانا عبدالعظیم قاضیا ندوی کی خصوصی تہنیت بھی کی گئی۔ اس موقع پر ان کی طویل دینی، تعلیمی اور سماجی خدمات کا اعتراف کرتے ہوئے انہیں خراجِ تحسین پیش کیا گیا۔
بھٹکل مسلم جماعت بنگلور کے صدر جناب مدثر ائیکری نے تمام مہمانان اور شرکائے پروگرام کا شکریہ ادا کرتے ہوئے کہا کہ موجودہ مصروف ترین دور میں پوری کمیونٹی کو ایک جگہ جمع کرنا آسان نہیں، تاہم ’’نَمّا ملن‘‘ اس حوالے سے ایک بہترین موقع فراہم کرتا ہے۔ انہوں نے امید ظاہر کی کہ نوائط کمیونٹی آئندہ بھی اتحاد و اتفاق کے ساتھ آگے بڑھتی رہے گی۔
انہوں نے بنگلور علاج کے لیے آنے والے افراد سے اپیل کی کہ وہ آنے سے قبل جماعت کو اطلاع دیں، تاکہ انہیں مناسب رہنمائی فراہم کی جاسکے۔ انہوں نے بتایا کہ بنگلور میں جماعت سے وابستہ تقریباً 16 ڈاکٹرز موجود ہیں، جنہیں ایک پلیٹ فارم پر جمع کیا گیا ہے، تاکہ ضرورت مند افراد ان کی خدمات سے بہتر طور پر استفادہ کرسکیں۔
پروگرام کے مہمانِ خصوصی اور انجمن حامیِ مسلمین بھٹکل کے صدر نے ’’نَمّا ملن 26‘‘ میں شرکت پر خوشی کا اظہار کرتے ہوئے کہا کہ یہ پروگرام ان کے لیے اس لیے بھی خاص اہمیت رکھتا ہے کہ ان کی جماعتی زندگی کا آغاز بھٹکل مسلم جماعت بنگلور سے ہوا تھا۔
انہوں نے مرحوم ایس ایم یحییٰ صاحب کو یاد کرتے ہوئے کہا کہ اگر وہ نہ ہوتے تو شاید آج وہ اس مقام پر کھڑے ہونے کے قابل نہ ہوتے۔ انہوں نے نونہالوں کی بہتر تعلیمی رہنمائی اور ان کے مستقبل کی تعمیر کے لیے Vision 2030 کے تحت جماعت کے ذمہ داران سے ملاقات اور مشاورت کا بھی عندیہ دیا۔
پروگرام کے کنوینر جناب ہود پلور نے اللہ تعالیٰ کا شکر ادا کرتے ہوئے انتظامیہ کے ارکان، رضاکاروں، پروگرام کے انعقاد میں تعاون کرنے والی خواتین اور تمام اسپانسرز کا شکریہ ادا کیا۔ انہوں نے کہا کہ مختلف افراد اور اداروں کے تعاون سے ہی اس پروگرام کو کامیابی کے ساتھ منعقد کرنا ممکن ہوسکا۔
صبح آٹھ بجے شروع ہونے والا یہ پروگرام شام پانچ بجے اپنے اختتام کو پہنچا ۔
