اندور:28نومبر2023(فکروخبر/ذرائع) ریاست مدھیہ پردیش کے صنعتی شہر اندور میں جلسے سے خطاب کرتے ہوئے کانگریس کے سینئر لیڈر راہل گاندھی نے کہا کہ نوٹ بندی اور جی ایس ٹی سے چھوٹے کاروبار کو شدید نقصان پہنچا جس سے بے روزگاری کی شرح میں اضافہ ہوا۔ کنیاکماری سے کشمیر تک بھارت جو یاترا پر نکلے آل انڈیا کانگریس کے سینئر لیڈر راہل گاندھی 81 دن بعد صنعتی شہر اندور پہنچے۔ 

راہل گاندھی نے گذشتہ شب اندور کے مرکز میں منعقدہ اجلاس سے خطاب کرتے ہوئے کہا کہ آج تک میں نے اندور شہر کے بارے میں سنا تھا کہ یہ صاف صفائی میں اول ہے لیکن یہ صاف صفائی میں ہی اول نہیں بلکہ عدل و انصاف میں بھی اس کی شاندار تاریخ رہی ہے۔ انہوں نے کہا کہ آج مجھے اندور میں صاف صفائی ہی نہیں بلکہ بھائی چارہ بھی دیکھنے کو ملا ہے۔ جب یاترا میں ہندو، مسلم، سکھ اور عیسائی تمام مذاہب کے لوگ مل کر چل رہے تھے۔ مجھے کہیں کوئی نفرت نظر نہیں آئی۔

انہوں نے جی ایس ٹی اور نوٹ بندی کے حوالے سے بی جے پی پر نشانہ لگاتے ہوئے کہا کہ ملک کو سب سے بڑا نقصان ان دو پالیسیوں سے پہنچا ہے۔ نوٹ بندی اور جی ایس ٹی۔ جو کام چائنا کی فوج نہیں کر سکتی وہ کام ان دو پالیسیوں نے کیا ہے۔ ان کی وجہ سے بے روزگاروں کی شرح میں اضافہ ہوا ہے۔ ان پالیسیوں نے چھوٹے کاروباری اور کاشتکار کو بری طرح سے متاثر کیا۔ ان پالیسیوں کی وجہ سے کیش لین دین ختم کردیا اور یہی کاروباری ہندوستان کے کروڑوں لوگوں کو روزگار فراہم کرتے ہیں۔ وہیں مہنگائی میں بھی مزید اضافہ ہوا ہے جس میں پیٹرول اور گیس سیلنڈر کے دام میں بھی بڑھوتری ہوئی ہے۔ میں چاہتا ہوں کہ اندور میں ملک کا سب سے بڑا ایئرپورٹ قائم ہو اور اندور ملک کا سب سے بڑا لاجسٹک حب بنے۔ جو مقام امریکہ کے شہر شکاگو کو حاصل ہے وہی مقام ہندوستان کے اندور کو حاصل ہو۔