بنگلورو25؍ ستمبر 2022(فکروخبرنیوز/ذرائع)  کرناٹک میں سرکاری ایمبولینس 108 کی  خدمات متاثر ہوئی ہیں جس کی وجہ سے ریاست میں بحرانی صورتحال پیدا ہو گئی ہے۔

تکنیکی خرابیوں کی وجہ سے ریاست بھر میں ایمبولینس خدمات کے لیے ہیلپ لائن 108 سے دو دن سے لوگوں کو کوئی جواب نہیں مل رہا ہے۔

108 ایمرجنسی ہیلپ لائن کے سربراہ ہنومنت جی آر نے بتایا کہ دو دنوں سے تکنیکی مسئلہ تھا۔ مدر بورڈ میں ایک خرابی ہے۔

دریں اثنا تکنیکی خرابیوں کی وجہ سے 108 ایمبولینس سروس کے عارضی طور پر بند ہونے پر تشویش کا اظہار کرتے ہوئے وزیر اعلی بسواراج بومائی نے سروس کو بحال کرنے کے لیے فوری اقدامات کرنے کا وعدہ کیا ہے۔

اتوار کو بنگلورو میں میڈیا کے نمائندوں سے بات کرتے ہوئے انہوں نے تصدیق کی کہ 108 ایمبولینس سروس کو عارضی بندش کا سامنا ہے اور مسائل کو ٹھیک کرنے کے لیے اقدامات کیے جا رہے ہیں۔

چیف منسٹر نے کہا کہ انہوں نے صحت اور خاندانی بہبود کے وزیر ڈاکٹر کے سدھاکر سے پہلے ہی بات کی ہے اور ان سے اصلاحی اقدامات کرنے کو کہا ہے تاکہ عوام کو ہنگامی حالات میں مشکلات کا سامنا نہ کرنا پڑے۔

بعد ازاں ڈاکٹر سدھاکر نے میڈیا کے نمائندوں کو بریفنگ دی اور تصدیق کی کہ 108 ایمبولینس سروس کی ہیلپ لائن کو کچھ تکنیکی مسائل کا سامنا کرنا پڑا تھا اور ہیلپ لائن پر کال کرنے میں 6 سے 7 منٹ لگتے ہیں۔

"ہم مسائل سے نمٹ رہے ہیں۔ 108 ہیلپ لائن اوسطاً روزانہ تقریباً 2,000 سے 2,500 کالوں کو ہینڈل کرنے میں کامیاب رہی جب کہ روزانہ 7,000 سے 8,000 کالز آتی ہیں۔