:06ستمبر 2020(فکرو خبر/ذرائع)بہار کے سابق نائب وزیر اعلیٰ اور اسمبلی میں حزب مخالف کے لیڈر تیجسوی یادو نے ہفتہ کے روز ریاست کے بے روزگاروں کے لیے بڑا اعلان کیا ہے۔ انھوں نے کہا ہے کہ اگر مہاگٹھ بندھن کی حکومت بنی تو 'میگا ڈرائیو' چلا کر سبھی بے روزگاروں کو ملازمت دی جائے گی۔ تیجسوی نے ریاست کے بے روزگاری کے رجسٹریشن کے لیے 'بے روزگاری ہٹاؤ' نام سے ایک ویب پورٹل اور ایک ٹول فری نمبر بھی جاری کیا۔

آر جے ڈی لیڈر نے ہفتہ کے روز پٹنہ میں ایک پریس کانفرنس سے خطاب کرتے ہوئے الزام عائد کیا کہ گزشتہ 15 سالوں میں نتیش کمار اپنے سیاسی روزگار کے چکر میں بہار کے کروڑوں نوجوانوں کو بے روزگار بناتے گئے۔ انھوں نے کہا کہ "آج ملک میں سب سے زیادہ بے روزگاری بہار میں ہے جو کہ 46.6 فیصد ہے۔ سب سے زیادہ روزگار کے لیے ریاست سے باہر ہجرت بہارمیں ہے، سب سے زیادہ غریبی بہار میں ہے، یہاں نصف سے زیادہ 52 فیصد لوگ غریبی میں زندگی گزار رہے ہیں۔"

تیجسوی یادو نے اپنی بات آگے بڑھاتے ہوئے مزید کہا کہ "گزشتہ ایک سال سے میں نے بے روزگاری ہٹانے اور روزگار کے مواقع کو پیدا کرنے کے لیے حکومت سے لگاتار مطالبہ کیا ہے۔ نتیجتاً آج آئندہ انتخاب میں شکست کا خطرہ دیکھ کر ملازمت کا اشتہار دینے کا ڈرامہ کر رہے ہیں۔" انھوں نے تنقید کرتے ہوئے سوالیہ لہجے میں یہ بھی کہا کہ "جس شخص نے اپنے 15 سالوں کے اقتدار میں روزگار پیدا کرنے کے تئیں سنجیدگی اور دلچسپی نہیں دکھائی، کیا اس سے آپ امید کر سکتے ہیں کہ وہ ایک مہینے میں آپ کو ملازمت دے گا؟"

اس موقع پر تیجسوی یادو نے بے روزگاروں کا ایک ڈاٹا بیس تیار کرنے کے لیے ویب پورٹل اور ٹول فری نمبر کا بھی اجراء کیا۔ انھوں نے کہا کہ ویب پورٹل پر بے روزگار اپنا بایوڈاٹا ڈال سکتے ہیں اور ٹول فری نمبر پر فون کر رجسٹریشن کرا سکتے ہیں۔ انھوں نے کہا کہ اگر آر جے ڈی کی حکومت بنی تو 'میگا ڈرائیو' چلا کر سبھی بے روزگاروں کو ملازمت دی جائے گی۔

آر جے ڈی لیڈر نے کہا کہ بہار کا سب سے بڑا مسئلہ بے روزگاری ہے اور کسی بھی حکومت کی پہلی، دوسری، تیسری اور آخری ترجیح اس کو دور کرنا ہی ہونی چاہیے۔ انھوں نے وعدہ کرتے ہوئے کہا کہ اگر آر جے ڈی کی حکومت بنی تو ان کی ترجیحات میں روزگار پیدا کرنا بھی شامل ہوگا۔