کورونا وائرس : سارک ممالک کی ویڈیو کانفرنس ، پی ایم مودی نے متحد ہو کر لڑنے کی اپیل کی ، پاکستان نے کشمیر سے ایمرجنسی ہٹانے کا مطالبہ کیا

:16 مارچ2020 (فکروخبر/ذرائع)وزیر اعظم نریندر مودی کورونا وائرس سے نمٹنے کے لیے مشترکہ حکمت عملی طے کرنے کے لیےسارک اراکین ممالک کی ویڈیو کانفرنس میں بھارت کی قیادت کر رہے تھے۔ اس دوران وزیر اعظم مودی نے کہا کہ 'کورونا سے کسی کو بھی ڈرنے کی ضرورت نہیں ہے۔'

غور طلب ہے کہ وزیر اعظم مودی نے سبھی سارک ممالک کو اس وائرس کے خلاف متحد ہو کر لڑنے کی اپیل کی تھی جس کے بعد کئی ممالک نے بھارتی وزیر اعظم کی مہم کی تائید کی تھی

اس دوران وزیر اعطم مودی نے کہا کہ 'ہم ٹیسٹ کٹ اور دیگر آلات کے ساتھ بھارت میں ڈاکٹروں اور ماہروں کی ایک ریپڈ رسپانس ٹیم تیار کر رہے ہیں۔'

انہوں نے کہا کہ 'ہمیں اس بیماری سے لرنے کے لیے ایک نگرانی کرنے والا سافٹ ویئر تیار کرنا چاہیے جو اس سے متاثرہ لوگوں کی جانچ کر سکے۔ یہ سافٹ ویئر ہم اپنے سارک ممالک کے ساتھ شیئر کریں گے۔'

انڈین کونسل آف میڈیکل ریسرچ اس وبا سے لڑنے میں ہماری مدد کرے گا۔

بھارت کورونا وائرس سے لڑنے کے لئے ہنگامی فنڈ بنانے کی تجویز پیش کرتا ہے۔ یہ ہم سب کی رضاکارانہ شراکت پر مبنی ہو سکتا ہے۔بھارت اس فنڈ کو ابتدائی طور پر 10 ملین امریکی ڈالر کی رقم سے شروع کرسکتا ہے۔

ہم نے 1400 بھارتیوں کو بیرون ممالک سے نکالا ہے۔ ساتھ ہی اپنے پڑوسی ممالک کے کچھ شہریوں کی بھی مدد کی۔

انہوں نے کہا کہ کورونا وائرس سے بچ کر رہنے کی ضرورت ہے۔انہوں نے کہا کہ 'بھارت میں کورونا وائرس کی روک تھام کے لیے مہم چلائی جا رہی ہے۔'

سارک ممالک کے رہنماوں کے ویڈیو کانفرنسنگ میں پاکستان نے کشمیر کا معاملہ اٹھاتے ہوئے کورونا وائرس کے پھیلنے کے دوران جموں و کشمیر خطے میں نافذ ایمرجنسی کو ہٹانے کی بات کہی۔

پاکستان کے ریاستی وزیر صحت ظفر مرزا نے کہا کہ جموں و کشمیر سے کورونا وائرس کے کیسز کی تصدیق ہوئی ہے، ایسے میں بھارتی حکومت کو چاہیے کہ صحت کے نقطۂ نظر سے فوری طور خطے میں ایمرجنسی کو ختم کرے۔

خیال رہے کہ گذشتہ برس 5 اگست کو جموں و کشمیر کی خصوصی حیثیت کو ختم کرنے کے ساتھ ہی خطے میں انٹرنیٹ اور آمد و رفت کو ختم کر دیا گیا تھا۔ ساتھ ہی سیاسی جماعتوں کے رہنماوں کو قید یا نظر بند بھی کر دیا گیا تھا، اسی بات کو سامنے رکھتے ہوئے ظفر مرزا نے اس پلیٹ فارم پر کشمیر کا معاملہ اٹھایا تھا۔

واضح رہے کہ تقریبا 135 ممالک میں کورونا وائرس کا قہر پھیل چکا ہے۔ ڈیڑھ لاکھ سے زائد افراد اس وائرس سے متاثر ہوئے ہیں۔ اور تقریبا 6 ہزار افراد ہلاک ہو چکے ہیں۔