روس اور چین کے ساتھ تخفیف اسلحہ کے معاہدے کی امریکی خواہش

ٹرمپ انتظامیہ کے ایک سینئر عہدیدار نے جمعہ کو بتایا کہ وائٹ ہاؤس روس اور چین کے ساتھ اسلحے کی روک تھام کے لیے ایک سہ فریقی معاہدہ کرنے کی کوشش کر رہا ہے۔  واشنگٹن حکومت نے ماسکو حکومت کو مطلع کر ديا ہے کہ اس سلسلے ميں ايک سمٹ منعقد کرائی جا سکتی ہے، جس میں تینوں ممالک کے ساتھ ساتھ سلامتی کونسل کے دیگر ارکان، برطانیہ اور فرانس بھی شامل ہوں گے۔ سلامتی کونسل کے یہ مستقل پانچ ارکان ‘P5’ کے نام سے بھی جانے جاتے ہیں۔

یہ پی فائیو اجلاس کب اور کہاں منعقد ہوگا اس حوالے سے ابھی تفصیلات سامنے نہیں آئیں۔ اس عہدیدار کے مطابق پی فائیو کے اجلاس کے لیے ایک موقع ستمبر میں اقوام متحدہ کی جنرل اسمبلی کا اجلاس ہوسکتا ہے، کیونکہ وہاں تقریبا تمام عالمی رہنما جمع ہوتے ہیں۔

اپنی شناخت مخفی رکھنے کی شرط پر اس امریکی عہدیدار نے مزید کہا، ''صدر ٹرمپ واضح کر چکے ہیں کہ وہ امریکی قومی سلامتی کے مفادات کو آگے بڑھانے کے لیے کسی بھی وقت کسی بھی عالمی رہنما سے ملاقات کے لیے تیار ہیں۔ امریکا دیگر پی فائیو ممالک کے ساتھ مل کر ایسی میٹنگ تیار کرنے اور منظم کرنے کے لیے کام کرے گا۔‘‘

 اسلحےکی روک تھام کا موجودہ معاہدہ

امريکا اور روس کے درميان اسلحے کے روک تھام  کا موجودہ نیو اسٹریٹیجک معاہدہ (نیو اسٹارٹ)  آئندہ برس ختم ہو رہا ہے۔ اس معاہدے کے تحت جوہری ہتھیار، میزائل اور بمبار طیاروں کی تعیناتی کی ایک مخصوص حد مقرر ہے۔

اس معاہدے کی مدت ميں توسيع پر بات چيت جاری ہے تاہم امريکا کا موقف ہے کہ مستقبل کے کسی معاہدے ميں چين کو بھی فريق کے طور پر شامل کيا جائے۔ روس نیو اسٹارٹ ميں پانچ برس کی توسيع چاہتا ہے اور وہ بھی چين کی شموليت پر بھی رضامندی کا عندیہ دے چکا ہے۔