شمالی کوریا کا کم فاصلے کے ہدف کا نشانہ بنانے والے بیلسٹک میزائل کا تجربہ

 نت نئے میزائل تجربات سے جزیرہ نما کوریا میں عسکری کشیدگی میں کمی پیدا نہیں ہو سکتی،جنوبی کوریا

سیول/پیانگ یانگ:31جولائی2019(فکروخبر/ذرائع)شمالی کوریا نے بدھ کو کم فاصلے کے ہدف کو نشانہ بنانے والے بیلسٹک میزائل کا تجربہ کیا ہے۔ادھر جنوبی کوریا کی فوج کے جوائنٹ چیفس آف اسٹاف نے کہاہے کہ وہ صورتحال کی نگرانی کر رہے ہیں اور مزید تجربات کا امکان ہے جبکہ جنوبی کوریائی وزیر خارجہ نے کہا ہے کہ ایسے میزائل کے تجربات سے جزیرہ نما کوریا میں عسکری کشیدگی میں کمی پیدا نہیں ہو سکتی۔ امریکی ٹی وی کے مطابق چند روز قبل بھی شمالی کوریائی حکومت نے ایسے ہی میزائل کے تجربات کیے تھے۔ ان تجربات کا مقصد اگلے ماہ شروع ہونے والی امریکی اور جنوبی کوریائی فوجی مشقوں کو روکنا خیال کیا گیا ہے۔ بدھ اکتیس جولائی کو تجرباتی میزائل مشرقی بندرگاہ سے داغے گئے۔ جنوبی کوریا کی فوج کے جوائنٹ چیفس آف اسٹاف کا کہنا تھاکہ وہ صورتحال کی نگرانی کر رہے ہیں اور مزید تجربات کا امکان ہے۔ جنوبی کوریائی وزیر خارجہ نے کہا کہ ایسے میزائل کے تجربات سے جزیرہ نما کوریا میں عسکری کشیدگی میں کمی پیدا نہیں ہو سکتی اور میزائل کے تجربات روکنے کا مطالبہ کیا ہے۔