غزہ کی پٹی،مقبوضہ بیت المقدس کے محاصرے کے پیچھے ایک گہری سازش ہے,ماہرین

مقبوضہ بیت المقدس:10؍ستمبر2018(فکروخبر/ذرائع)مسجد اقصی اور القدس کے امور کے ماہر جمال عمرو نے کہا ہے کہ غزہ کی پٹی اور مقبوضہ بیت المقدس کے محاصرے کے پیچھے ایک گہری سازش ہے۔ انہوں نے غزہ کی پٹی کے عوام کو مشکلات میں ڈالنے کی اتھارٹی اور صدر محمود عباس کی پالیسی کو کڑی تنقید کا نشانہ بنایا۔ا نہوں نے کہا ہے کہ محمود عباس کی مسجد اقصی کی مسلسل بے حرمتی پر خاموشی اور القدس پر صہیونی قبضے کے حوالے سے لاپرواہی اس بات کا ثبوت ہے کہ وہ قوم کے کلیدی نوعیت کے مسائل کے حل میں کوئی دلچسپی نہیں رکھتے۔جمال عمرو نے ان خیالات کا اظہار فلسطینی میڈیا کو دئیے گئے ایک انٹریو میں کیا۔ ا نہوں نے کہاکہ فلسطینی بیداری قومی عزم واسقلال کا راز ہے اور اسی عزم کے ذریعے غزہ اور القدس کا محاصرہ ختم کیا جاسکتا ہے۔ایک سوال کے جواب میں جمال عمرو نے کہا ہے کہ پرانے بیت المقدس پر صہیونی ریاست کا تسلط اور غزہ کی پٹی کا محاصرے کا آپس میں گہرا ربط ہے۔انہوں نے مزید کہا کہ غزہ کی پٹی اور القدس کے محاصرے کے درمیان معمولی سا فرق ہے۔ غزہ کی پٹی کے محاصرے میں اسرائیل کے ساتھ فلسطینی اتھارٹی ، محمود عباس اور وزیراعظم رامی الحمد اللہ کھلے عام شریک ہیں جب کہ القدس کے محاصرے میں صدر عباس اور ان کے مقربین خاموشی اختیار کیے ہوئے ہیں۔ایک سوال کے جواب میں فلسطینی تجزیہ نگا ر نے کہا ہے کہ پرانے بیت المقدس کی فلسطینی آبادی سنگین مشکلات کا شکار ہے۔ تمام تر مشکلات کے باوجود القدس کے باشندے پرانے بیت المقدس کے بازاروں سے خریداری پرقائم ہیں چاہے انہیں اس کی جو بھی قیمت ادا کرنا پڑے۔انہوں نے کہا کہ یہ طرز عمل اس بات کا ثبوت ہے کہ فلسطینی قوم اپنے خلاف ہونے والی سازش کے حوالے سے بیدار ہے، مگر دوسری طرف صدی کی ڈیل کی امریکی سازش پر فلسطینی اتھارٹی مجرمانہ غفلت کا شکار ہے۔انہوں نے فلسطینی اتھارٹی کے دوغلے پن کی مذمت کی اور کہا کہ غزہ کی پٹی فلسطینی مزاحمت کاروں کا مرکز ہونے کے ساتھ صہیونی غاصب ریاست کے سامنے مزاحمت کا مضبوط محاذ ہے۔مقبوضہ بیت المقدس سے تعلق رکھنے والے فلسطینی تجزیہ نگار جمال عمرو نے مرکزاطلاعات فلسطین سے بات کرتے ہوئے کہا کہ صہیونی ریاست اس وقت غزہ کی پٹی اور بیت المقدس پر اپنی رعونت کا استعمال کررہا ہے۔ فلسطینی اتھارٹی کو غزہ اور القدس کے عوام کے مسائل کے حل میں کوئی دلچسپی نہیں۔ اس کی دلچسپی اور تمام تر توجہ غرب اردن میں یہودی آباد کاروں اور غاصبوں کو تحفظ دلانا ہے۔جمال عمرو نے کہا ہے کہ غزہ اور القدس صہیونی ریاست کے پروگرام کے سامنے ایک بھاری پھتر ہے۔ فلسطینی قوم زندہ اور بیدار ہے اور وہ دشمن کے سامنے گھٹنے نہیں ٹیکے گی۔ صہیونی ریاست کے سامنے پورے عزم کے ساتھ مزاحمت جاری رکھنا ہی عزم استقلال کی علامت ہے۔انہوں نے کہا کہ اسرائیل اقتصادی اور سیکیورٹی کے پہلو سے مسجد اقصی کا محاصرہ کررہی ہے۔ بیت المقدس میں فلسطینی تاجروں پر پابندیاں اور یہودی کاروباری طبقے کو سہولتیں دی جا رہی ہیں۔مسجد اقصی صبح وشام یہودیوں سے بھری رہتی ہے۔ قبلہ اول کے تمام راستے یہودیوں کے لیے کھول دیے گئے ہیں۔ القدس کے فلسطینی باشندوں پرعرصہ حیات تنگ کردیا گیا۔ وہ اپنے تحفظ کے لیے کوئی چیز لا سکتے ہیں اور نہ ہی اپنے گھروں کی تعمیرو مرمت کرسکتے ہیں۔القدس اور اس کے باشندوں پر لگائی جانے والی صہیونی ضربیں اپنی انتہا کو پہنچ چکی ہیں۔