ದೇಶವನ್ನೇ ನಡುಗಿಸಿದ ಪೊಲ್ಲಾಚಿ ಸೆಕ್ಸ್​ ಸ್ಕ್ಯಾಂಡಲ್​... ಜಾಲಕ್ಕೆ ಸಿಕ್ಕವರು 50 ಯುವತಿಯರು

ಚೆನ್ನೈ: 12 ಮಾರ್ಚ್ (ಫಿಕ್ರೋಖಬರ್ ಸುದ್ದಿ) ಪೊಲ್ಲಾಚಿ ಸೆಕ್ಸ್​ ಸ್ಕ್ಯಾಂಡಲ್​ ಪ್ರಕರಣ ದೇಶವನ್ನೇ ನಡುಗಿಸಿದ್ದು, ಈ ವಂಚಕರ ಜಾಲಕ್ಕೆ ಸಿಲುಕಿದವರು ಒಬ್ಬರಲ್ಲ 50 ಮಹಿಳೆಯರು ಎಂಬುದು ತನಿಖೆಯಿಂದ ಗೊತ್ತಾಗಿದೆ. ಪ್ರಕರಣ ಸಂಬಂಧ ನಾಲ್ವರು ಯುವಕರನ್ನು ಬಂಧಿಸಲಾಗಿದ್ದು, ಇವರ ಮೊಬೈಲ್​ಗಳಲ್ಲಿ ಯುವತಿಯರೊಂದಿಗೆ ನಡೆಸಿದ್ದ ಅಶ್ಲೀಲ ಚಾಟಿಂಗ್​, ಅವರ ಫೋಟೊಗಳು ಲಭ್ಯವಾಗಿವೆ. ಕೊಯಮತ್ತೂರು ಜಿಲ್ಲೆಯ ಪೊಲ್ಲಾಚಿ ಎಂಬಲ್ಲಿ ನಾಲ್ವರು ಯುವಕರು ಯುವತಿಯೊಬ್ಬಳ ಮೇಲೆ ಲೈಂಗಿಕ ದೌರ್ಜನ್ಯ ಎಸಗುತ್ತಿರುವ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್​ ಆಗಿತ್ತು. ಸಂತ್ರಸ್ತೆಯನ್ನು ರಕ್ಷಿಸಿ ಕಾಮುಕರಿಗೆ ಶಿಕ್ಷೆ ವಿಧಿಸಬೇಕೆಂಬ ಕೂಗು ನೆಟ್ಟಿಗರಿಂದ ಕೇಳಿಬಂದಿತ್ತು. 

ಯಾರಿವರು ಪೊಲ್ಲಾಚಿ ಕಾಮುಕರು?

ಹದಿಹರೆಯದ ಯುವತಿಯರನ್ನು ನಕಲಿ ಖಾತೆಗಳಿಂದ ಫೇಸ್​ಬುಕ್​ನಲ್ಲಿ ಪರಿಚಯಿಸಿಕೊಳ್ಳುತ್ತಿದ್ದ ಈ ಗ್ಯಾಂಗ್​ ಮೊದಲಿಗೆ ಆತ್ಮೀಯವಾಗಿ ಮಾತನಾಡಿ ಸೆಕ್ಸ್​ ಚಾಟ್​ಗೆ ಎಳೆಯುತ್ತಿದ್ದರು. ಟೆಕ್ಸ್ಟ್​, ಅವರು ಕಳುಹಿಸಿದ ಫೋಟೊ ಹಾಗೂ ವಿಡಿಯೊಗಳು ಸಿಕ್ಕ ನಂತರ ತಮ್ಮ ನಿಜವಾದ ಗುರುತನ್ನು ಬಹಿರಂಗಪಡಿಸಿ, ಫೋಟೊ, ವಿಡಿಯೊ ತೋರಿಸಿ ಬ್ಲಾಕ್​ಮೇಲ್​ ಮಾಡುತ್ತಿದ್ದರು. ಪೊಲ್ಲಾಚಿಯ ಬಂಗಲೆಯೊಂದಕ್ಕೆ ಕರೆಸಿಕೊಂಡು ಈ ಗ್ಯಾಂಗ್​ ತಮ್ಮ ಲೈಂಗಿಕ ತೃಷೆ ತೀರಿಸಿಕೊಳ್ಳುತ್ತಿದ್ದರು ಎಂದು ತಿಳಿದುಬಂದಿದೆ. 

ಸಿಕ್ಕಿಹಾಕಿಕೊಂಡಿದ್ದು ಹೇಗೆ?

ಈಚೆಗೆ 19 ವರ್ಷದ ಯುವತಿಯನ್ನು ಕಾರಿನಲ್ಲಿ ಕೂರಿಸಿಕೊಂಡಿದ್ದ ಯುವಕರ ಗುಂಪು ಆಕೆ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದರು. ಪಾರ್ಟಿಗೆಂದು ಕರೆದುಕೊಂಡು ಹೋಗಿದ್ದ ಯುವಕರು ತನ್ನ ಮೇಲೆ ದೌರ್ಜನ್ಯ ಎಸಗಿದ್ದಾಗಿ ಯುವತಿಯು ತನ್ನ ದೂರಿನಲ್ಲಿ ತಿಳಿಸಿದ್ದಳು. ಘಟನೆ ನಡೆದ ನಂತರ ಯುವತಿಯು ಈ ವಿಷಯವನ್ನು ತನ್ನ ಸಹೋದರನಿಗೆ ತಿಳಿಸಿದ್ದಾಳೆ. ವಿಡಿಯೊ ಡಿಲಿಟ್​ ಮಾಡುವಂತೆ ಆಕೆಯ ಸಹೋದರ ಆ ಗ್ಯಾಂಗ್​ ಸಂಪರ್ಕಿಸಿದಾಗ ಆತನಿಗೆ ಬೆದರಿಕೆ ಹಾಕಿ ಕಳುಹಿಸಿದ್ದಾರೆ. ನಂತರ ಪೋಷಕರಿಗೆ ಈ ವಿಷಯ ಗೊತ್ತಾಗಿ ಕೊಯಮತ್ತೂರು ಪೊಲೀಸರ ಮೊರೆ ಹೋಗಿದ್ದಾರೆ. ಅಂತೂ ಈ ಯುವಕರನ್ನು ಪೊಲೀಸರು ಹೆಡೆಮುರಿ ಕಟ್ಟಿದ್ದು, ಇವರ ಮೊಬೈಲ್​ನಲ್ಲಿರುವ ಇನ್ನಷ್ಟು ಯುವತಿಯರ ಚಾಟ್ಸ್​ ಬೆಚ್ಚಿ ಬೀಳಿಸುವಂತಿದೆ. 
ಈ, ಇ ವರದಿ