English   /   Kannada   /   Nawayathi

بہار میں بی جے پی کو ایک اور جھٹکا، اسپیکر وجے کمار سنہا کے خلاف عدم اعتماد کی تحریک پیش

share with us

پٹنہ:10اگست 2022(فکروخبرنیوز/ذرائع)بہار میں نتیش کمار کے جھٹکے سے بی جے پی ابھی سنبھلی بھی نہیں تھی کہ عظیم اتحاد نے اسے ایک اور جھٹکا دے دیا۔ للت یادو کی قیادت میں عظیم اتحاد کے رہنماؤں نے موجودہ اسپیکر وجے کمار سنہا کے خلاف تحریک عدم اعتماد پیش کر دی ہے، جس کے بعد اسپیکر کا عہدہ بی جے پی کے ہاتھ سے جانا یقینی ہو گیا ہے۔

عظیم اتحاد کے 50 ارکان اسمبلی کے دستخط شدہ ایک خط بدھ کے روز بہار قانون ساز اسمبلی کے سکریٹری کو سونپا گیا۔ تحریک عدم اعتماد کے تحت اب وجے کمار سنہا کو اسپیکر کے عہدے پر برقرار رہنے کے لیے اسمبلی کے اندر اپنی اکثریت ثابت کرنا ہوگی۔ اگر انہیں پورے ووٹ نہیں ملے تو انہیں عہدے سے استعفیٰ دینا پڑے گا۔ خیال رہے کہ بی جے پی کے پاس محض 77 ارکان اسمبلی ہیں، جو سنہا کو اسپیکر کے عہدے پر برقرار رکھنے کے لیے کافی نہیں ہیں۔

عظیم اتحاد کی نئی حکومت میں آر جے ڈی کے سب سے سینئر رکن اسمبلی اودھ بہاری چودھری اسپیکر عہدے کی ریس میں سب سے آگے ہیں۔ تاہم اس ریس میں جے ڈی یو کے وجے کمار چودھری کا نام بھی چل رہا ہے، جو پچھلی حکومت میں وزیر تعلیم تھے اور ماضی میں اسپیکر بھی رہ چکے ہیں۔ وہیں کانگریس کو بھی اسپیکر کا عہدہ دینے پر غور کیا جا رہا ہے۔ فی الحال کوئی حتمی فیصلہ نہیں لیا گیا ہے۔

نتیش کمار اور تیجسوی کے حلف لینے کے بعد ان کی کابینہ پر بھی قیاس آرائیاں شروع ہو گئی ہیں۔ اطلاعات کے مطابق جنتا دل یونائیٹڈ اور راشٹریہ جنتا دل کے درمیان بات چیت کے مطابق خزانہ، ماحولیات اور جنگلات، لینڈ ریکارڈ اور ریونیو، صحت، سڑک تعمیر اور پنچایتی راج کی وزاتیں آر جے ڈی کے کھاتہ میں جا سکتی ہیں۔ خیال کیا جا رہا ہے کہ وزیر اعلیٰ نتیش کمار وزارت داخلہ اور جنرل ایڈمنسٹریشن کو اپنے پاس رکھیں گے۔

Prayer Timings

Fajr فجر
Dhuhr الظهر
Asr عصر
Maghrib مغرب
Isha عشا