Live Madinah

makkah1

dushwari

تازہ ترین خبر:

مالی مدد سے ہسپتالوں کے جنریٹرز کے لیے فوری طور پر ایندھن خریدا جائے گا،اقوام متحدہ

مقبوضہ غزہ۔10فروری2018(فکروخبر/ذ رائع) فلسطینی علاقے غزہ میں صحت کی خراب صورت حال کو بہتر بنانے کے لیے متحدہ عرب امارات نے دو ملین اور قطر نے نو ملین ڈالر فراہم کیے ہیں۔غیرملکی خبررساں ادارے کے مطابق غزہ کے ہسپتالوں میں لگائے گئے ایمرجنسی جنریٹرز ایندھن کی عدم دستیابی کی وجہ سے بند ہونا شروع ہو گئے ہیں۔ اقوام متحدہ کی جانب سے گزشتہ منگل کو مالی امداد فراہم کرنے کی خصوصی اپیل بھی جاری کی گئی تھی۔ عالمی ادارہ صحت کے مطابق متحدہ عرب امارات کی مالی مدد سے ہسپتالوں کے جنریٹرز کے لیے فوری طور پر ایندھن خریدا جائے گا۔ غزہ میں تیرہ ہسپتال اور چودہ میڈیکل سینٹرز ہیں اور انہیں مشکل صورت حال کا سامنا ہے۔

بحران سے نمٹنے کے لیے قطر اپنے اولین بین الاقوامی بونڈز کے اجراء کی منصوبہ بندی کر رہا ہے،رپورٹ 

نیویارک۔27جنوری2018(فکروخبر /ِذرائع) عالمی بینکوں کی جانب سے قطر کے اولین بین الاقوامی بونڈز کے اجراء کی فنڈنگ سے انکار کے بعد قطر کو بڑے پیمانے پر شش و پنج کا سامنا ہے۔میڈیارپورٹس کے مطابق یہ پیش رفت دوحہ میں معیشت کی لڑکھڑاتی صورت حال کے سبب قطری ریال کی بگڑتی حالت کے ساتھ سامنے آئی ہے۔اس بحران سے نمٹنے کے لیے قطر اپنے اولین بین الاقوامی بونڈز کے اجراء کی منصوبہ بندی کر رہا ہے اور اس وقت نو ارب امریکی ڈالر کی فنڈنگ حاصل کرنے کے لیے کوشاں ہے۔

دوحہ:24؍جنوری2018(فکروخبر/ذرائع)قطر نے اپنے قریبی اتحادی کی قومی سلامتی کی خاطر ترک فوج کی جانب سے شام میں کرد ملیشیا کے خلاف جاری آپریشن کی حمایت کا اعلان کردیا۔فرانسیسی خبر رساں ادارے اے ایف پی کے مطابق قطر کی وزارت خارجہ کی ترجمان کا کہنا تھا کہ ترکی کی حدود میں ہونے والے حالیہ حملوں کے پیش نظر ترک حکومت کی جانب سے اٹھائے گئے اقدامات پر قطر نے ترکی سے مکمل تعاون کی یقین دہانی کرائی ہے۔

قطری حکومت کشیدگی کو بڑھاوا دینے کے لیے کوئی موقع ہاتھ سے جانے نہیں دے رہی ،شیخ سلطان بن سحیم آل ثانی

دوحہ۔16جنوری2018(فکروخبر /ذرائع) قطر کی حزبِ اختلاف کے رہ نما شیخ سلطان بن سحیم آل ثانی نے متحدہ عرب امارات کے دو مسافر طیاروں کو روکنے کے لیے لڑاکا جیٹ بھیجنے پر دوحہ حکومت کی مذمت کردی ۔غیرملکی خبررساں ادارے کے مطابق اپنے ٹویٹر اکاؤنٹ پرانہوں نے لکھا کہ قطر کو پہلے نمبر پر ایرانی اور اسرائیلی طیاروں کو روکنے کی ضرورت ہے جو اس کی فضائی حدود میں اڑتے نظر آتے ہیں لیکن اس کے بجائے اس نے ہمارے بھائیوں کے شہری طیارے کو روکنے ی کوشش کی ہے۔انھوں نے مزید لکھاکہ قطری حکومت کشیدگی کو بڑھاوا دینے کے لیے کوئی موقع ہاتھ سے جانے نہیں دے رہی ہے ۔

دبئی:16؍جنوری2018(فکروخبر/ذرائع)متحدہ عرب امارات نے الزام عائد کیا ہے کہ قطری جنگی جہازوں نے دوران پرواز فضا میں اس کے مسافر جہاز کا راستہ روکنے کی کوشش کی۔اماراتی میڈیا کے مطابق یو اے ای جنرل سول ایوی ایشن اتھارٹی نے بیان میں الزام عائد کیا کہ قطری فضائیہ کے جنگی جہازوں نے اماراتی مسافر طیارے کا بحرین جاتے ہوئے ماناما کی فضائی حدود میں راستہ کاٹا ہے۔حکام کا کہنا ہے کہ مذکورہ پرواز معمول کے مطابق اپنے مقررہ روٹ سے گزر رہی تھی کہ اسی دوران قطری جنگی جہاز اس کے راستے میں آگئے اور راستہ کاٹ کر چلے گئے۔

متحدہ عرب امارات کے دارالحکومت ابوظہبی میں قید ہوں،شیخ عبداللہ بن علی الثانی 

ابو ظہبی :15؍جنوری2018(فکروخبر/ذرائع)قطری شاہی خاندان کے ایک رکن شیخ عبداللہ بن علی الثانی نے متحدہ عرب امارات (یو اے ای) پر خود کو قید کرنے کا الزام لگا دیا۔الجزیرہ کی ایک رپورٹ کے مطابق شیخ عبداللہ بن علی الثانی نے اپنے ویڈیو پیغام میں کہا، 'میں متحدہ عرب امارات کے دارالحکومت ابوظہبی میں قید ہوں'۔ان کا کہنا تھا، 'میں اس وقت ابوظہبی میں ہوں، میں یہاں شیخ محمد کا مہمان تھا، لیکن اب میں یہاں مہمان نہیں ہوں، میں ایک قیدی ہوں'۔

دوحہ:14؍جنوری2018(فکروخبر/ذرائع)خلیجی ریاست قطر کی حکومت نے الزام عائد کیا ہے کہ متحدہ عرب امارات کے ایک جنگی طیارے نے اُس کی ملکی فضائی حدود کی دوسری مرتبہ خلاف ورزی کی ہے۔ قطر نے اس خلاف ورزی پر اقوام متحدہ کو شکایتی مراسلہ روانہ کیا ہے۔ قطر کے مطابق فضائی حدود کی خلاف ورزی تین جنوری کو کی گئی تھی۔ اس خلاف ورزی کی تمام متعلقہ تفصیلات کا جائزہ لینے کے بعد اقوام متحدہ کو مطلع کیا گیا ہے۔ اس سے قبل گزشتہ برس اکیس دسمبر کو بھی متحدہ عرب امارات کے جنگی طیارے کی خلاف ورزی کی اطلاع عالمی ادارے کو دی گئی تھی۔

دوحہ:07؍ڈسمبر2017(فکروخبر/ذرائع):قطرنے امریکی صدر کی جانب سے سفارتخانے کی منتقلی کے اعلان کو فلسطین میں قیام امن کی کوششوں کے لئے موت کا پروانہ قرار دے دیا ہے، امریکی صدر کے اس اقدام کی وجہ سے خطے میں افراتفری اور خطرناک صورت حال پیدا ہوگی۔ٹرمپ نے مقبوضہ بیت المقدس کو اسرائیل کا دارلحکومت تسلیم کر کے مسلمانوں کے خلاف طبلِ جنگ بجا دیا,الجزیرہ ٹی وی کے مطابق قطر کے وزیر خارجہ شیخ محمد بن عبدا لرحمان الثانی نے کہا ہے کہ ڈونلڈ ٹرمپ کی جانب سے بیت المقدس کو اسرائیل کا دارالحکومت قرار دینے کا اعلان ان لوگوں کے لئے ڈوب مرنے کا مقام ہے جو خطے میں قیام امن کے خواہش مند ہیں۔

سعودی عرب حکومتوں کی تبدیلی کی پالیسی پر عمل پیرا نہیں،قطر حالتِ انکار کے رویے کو تبدیل کرے،گفتگو

ریاض۔9نومبر2017(فکروخبر/ذرائع )سعودی وزیر خارجہ عادل الجبیر نے کہا ہے کہ قطر ی تنازع بہت چھوٹا معاملہ ہے اور یہ کوئی بحران نہیں ہے ۔ہمیں اس سے بڑے مسائل درپیش ہیں۔ان میں انتہاپسندی اور دہشت گردی ، ایران کا جارحانہ رویہ ،عراق ، شام ، لبنان اور یمن میں جاری بحران اور لیبیا میں کام نمایاں ہیں۔اس لیے قطری ایشو کو عوام کا مرکزِ توجہ نہیں ہونا چاہیے۔وہ امریکا کے ایک ٹی وی پروگرام میں گفتگوکررہے تھے ۔

لازمی ویزاکی شرط قابل مذمت،بحرین خلیج تعاون کونسل معاہدوں کی خلاف ورزی کررہاہے،قطرکا ردعمل

دوحہ/ماناما ۔2نومبر2017(فکروخبر /ذرائع ) بحرین نے ملک میں داخل ہونے والے قطری شہریوں کے لیے ویزا لازمی قرار دے دیا۔غیر ملکی خبررساں ادارے کے مطابق بحرین نے قطر کے شہریوں پر ویزا کی شرط لاگو کردی ہے جو 10 نومبر سے نافذ العمل ہوگی۔ بحرین کے حکام کا کہنا تھاکہ قطری شہریوں کے لیے ویزا لازمی قرار دیئے جانے کا مقصد ملک کی سیکیورٹی کو بہتر بنانا ہے کیوں کہ حالیہ تنازعہ کے بعد شہریوں کی حفاظت کے لیے ایسے اقدامات ضروری ہوگئے تھے۔اس سے قبل خلیج تعاون کونسل میں شامل 6 ممالک کے شہریوں پر آمدورفت کے لیے ویزا ہونا ضروری نہیں تھا۔

صفحہ 1 کا 6